Baret dhe Restorantet në Shqipëri në krizë për punëtorë/ Jahaj: Parashikimet janë të zymta, në pandemi fuqia punëtore u largua

Në një kohë kur Shqipëria po bëhet gati për nisjen e sezonit të ri turistik bizneset e hoteleri-turizmit po përjetojnë periudhën më të errët të tyre sa i përket fuqisë punëtore.

Enri Jahaj, nga  shoqata e Bareve dhe Restoranteve në një intervistë për “Ora News” u shpreh pesimist sa i përket së ardhmes, teksa tha se parashikimet janë të zymta, në pandemi fuqia punëtore u largua.

“Kemi një shprehje disfatiste, që ka punë por nuk ka profesionistë. Dakord, por çfarë do të bëjmë? O do qajmë ose do investojmë. Ndërkohë që në Shqipëri po investohet me ritme shumë të shpejta dhe mund të themi që ne kemi baret dhe restorantet ndër më të mira në Evropë sa i përket nivelit të investimit.

Por është çështje tjetër se kush i punon këto bare dhe restorante, kjo pastaj është hajde të gjejmë njerëz, hajde t’i themi Ministrisë së Arsimit që të investojë që në arsimim për hotelerinë, në mënyrë që këta të rinj në vend që të rrinë gjithë ditën me “instagram” dhe tiktok”, të kuptojnë se përtej rrjeteve sociale të kuptojnë që ka punë për ta, para për t’u paguar. Absolutisht që ka një punë si kjo e mikpritjes është një ndër më të bukurat.

Të rinjtë nuk e duan këtë gjë pasi ndikohen nga rrjetet sociale, të cilat thonë mos puno 9 me 5, puno nga shtëpia, paguhesh 2 mijë deri në 3 mijë në muaj dhe kështu gjërash.

Nuk e di se ka njeri që të të falë lekë. Por di që ne sot duhet të tentojmë t’i mbajmë ata të rinj që kërkojnë sot të ikin nga Shqipëria dhe të kuptojnë që punë për ta ka plot dhe të përkthyera në standardin e jetës në Shqipëri janë punë që garantojnë një jetë shumë të mirë dhe shumë indipendente”, theksoi ndër të tjera Enri Jahaj, nga  shoqata e Bareve dhe Restoranteve.

Rruga Press