Gjermania do të dërgojë për herë të parë gjashtë helikopterë ushtarakë në Ukrainë

Pas takimit të 18-të në formatin Ramstein, ministri gjerman i Mbrojtjes, Boris Pistorius, ka njoftuar se Gjermania do t’i dorëzojë Ukrainës helikopterët ushtarakë shumëfunksionalë “Sea King Mk41”.

Pistorius ka thënë se Ukraina do të marrë gjashtë helikopterë me shumë funksione “Sea King Mk41” së bashku me një grup pjesësh rezervë. Pala gjermane do të ofrojë gjithashtu trajnime për ushtrinë ukrainase.

“ ‘Sea King’ është një helikopter i provuar dhe i besueshëm që do të ndihmojë ukrainasit në shumë fusha: nga zbulimi mbi Detin e Zi deri te transportimi i ushtarëve. Kjo është dërgesa e parë gjermane e këtij lloji”, ka thënë Pistorius.

Ministria gjermane e Mbrojtjes shtoi se që nga fillimi i luftës së Rusisë kundër Ukrainës, shuma totale e ndihmës ushtarake gjermane për Kievin ka arritur në rreth 6 miliardë euro. Më herët u njoftua se Gjermania do të furnizojë Ukrainën me mallra ushtarake me vlerë më shumë se 7 miliardë euro në vitin 2024.

Në takimin në Ramstein, Kanadaja njoftoi paketë të re ndihme ushtarake për Kievin dhe përfshirjen e instruktorëve kanadezë në trajnimin e pilotëve ukrainas në avionët luftarakë F-16.

Rruga Press