Netanyahu refuzon thirrjet e SHBA-ve për shtetin palestinez pas konfliktit: Duam fitore absolute

Benjamin Netanyahu ka hedhur poshtë thirrjet e SHBA për zhvillimin e një shteti palestinez pas përfundimit të luftës, pasi ai u zotua se ofensiva në Gaza do të vazhdojë për shumë muaj.

Në një konferencë shtypi në televizion kombëtar dje, kryeministri izraelit tha me një ton sfidues, se Izraeli nuk do të ndalojë ofensivën e tij derisa të arrijë qëllimet e tij për të shkatërruar grupin militant Hamas dhe për të sjellë në shtëpi të gjithë pengjet e mbetura në Gaza.

“Ne nuk do të kënaqemi me asgjë tjetër përveç një fitoreje absolute”, tha zoti Netanyahu.

Aleati më i afërt i Izraelit, SHBA, i ka kërkuar vendit të zvogëlojë intensitetin e ofensivës së tij shkatërruese ushtarake që ka vrarë afro 25,000 palestinezë, sipas ministrisë së shëndetësisë të drejtuar nga Hamasi.

Shtetet e Bashkuara kanë thënë se Autoriteti Palestinez i njohur ndërkombëtarisht, i cili qeveris zona të caktuara në Bregun Perëndimor të pushtuar nga Izraeli, duhet të “rigjallërohet” dhe të kthehet në Gaza, pasi u dëbua nga territori në vitin 2007.

SHBA ka bërë thirrje gjithashtu për hapa drejt krijimit të një shteti palestinez.

Duke folur të mërkurën, Antony Blinken, sekretari amerikan i shtetit, tha se zgjidhja me dy shtete ishte mënyra më e mirë për të mbrojtur Izraelin, për të bashkuar vendet e moderuara arabe dhe për të izoluar armikun kryesor të Izraelit, Iranin.

Rruga Press