KFOR-i pas Banjskës: Kemi shtuar 1000 trupa e pajisje më të rënda

Misioni i Organizatës së Traktatit të Atlantikut Verior (NATO) në Kosovë, KFOR ka konfirmuar se ka shtuar numrin e ushtarëve rreth 1000 ushtarë dhe është përforcuar me makineri më të rëndë, pas sulmit terrorist në Banjskë më 24 shtator.

KFOR-i ka thënë se nuk spekulon për mundësinë e ndonjë sulmi tjetër të mundshëm në veri, pas alarmit që bënë liderët e shtetit javëve të fundit.

“Ne nuk do të spekulojmë për ndonjë skenar të ardhshëm. Jemi në kontakt të ngushtë me institucionet në Kosovë dhe me organizatat e sigurisë së Kosovës, si dhe me palë të tjera, duke përfshirë misionin e BE-së për Sundimin e Ligjit (EULEX), Shefin e Shtabit të Forcave të Armatosura Serbe, OSBE-në dhe OKB-në”, thuhet në përgjigjen e KFOR-it.

Në përgjigje është thënë po ashtu se është trefishuar patrullimi përgjatë kufirit Kosovë-Serbi. KFOR-i ka thënë se mbetet i fokusuar në zbatimin e mandatit që ka, për të ofruar siguri në Kosovë.

“Pas rritjes së tensioneve muajve të fundit, NATO ka vendosur 1000 trupa shtesë dhe pajisje më të rënda. Ne kemi katërfishuar praninë e KFOR-it në veri të Kosovës dhe kemi trefishuar numrin e patrullave, duke përfshirë edhe përgjatë vijës kufitare administrative. Këto janë hapa të matur për të siguruar që misioni i KFOR-it të ketë burimet e nevojshme për të trajtuar çdo skenar dhe për të vazhduar zbatimin e mandatit të tij të OKB-së”, thuhet më tej në përgjigje.

KFOR-i ka thënë se ka bashkëpunim të ngushtë me Policinë e Kosovës dhe EULEX-in për të parandaluar përshkallëzimin e mundshëm dhe se janë të gatshëm t’i përgjigjen çfarëdo sfide.

Sipas KFOR-it, vizita e sekretarit të përgjithshëm të NATO-s, Jens Stoltenberg, muajin e shkuar në Kosovë, ka qenë mesazh i qartë që duhet të ulen tensionet dhe të ketë përmbajtje nga veprimet që çojnë drejt përshkallëzimit të situatës.

Në fund të shtatorit, në një sulm të organizuar nga serbë të armatosur u vra polici Afrim Bunjaku. Në aksionin pasues, nga Policia u vranë tre sulmues, ndërsa shumica e grupit arriti të ikte.

Që nga ajo kohë, liderët e Kosovës kanë alarmuar në vazhdimësi për prani të shtuar ushtarake nga Serbia përgjatë kufirit me Kosovën.

Rruga Press