Kurti: Prioriteti i Kosovës është siguria dhe se Serbia po saboton e po shkakton vonesa në dialog

Kryeministri i vendit Albin Kurti ka thënë se fokusi i Kosovës është komplet te siguria pas sulmit terrorist në Banjskë, deri sa ka lënë fajtore Serbinë për sabotim të dialogut dhe vonesa në zbatim të marrëveshjeve.

Këto komente Kurti i ka bërë të premten teksa ka vizituar kryetarin e Gjilanit, Alban Hyseni.

Kryeministri ka thënë se po punohet me institucionet e sigurisë dhe me ndërkombëtarë për të siguruar gjithë vijën kufitare me Serbinë në mënyrë që të mos rrezikohet Kosova.

“Siguria nënkupton edhe që kriminelët të mos jenë të lirë”, ka thënë Kurti, në një takim që ka pasur me kryetarin e Gjilanit.

Tutje Kurti ka thënë se nuk është në dijeni për ndonjë takim të planifikuar me palën serbe në Bruksel por ka deklaruar se Qeveria e Kosovës është e përkushtuar, konstruktive dhe kreative në dialog.

Duke folur për marrëveshjen për energjinë, Kurti ka thënë se një dokordim i tillë është dashur të zbatohet më 2021, por edhe këtë vit.

“Të gjitha vonesat dhe sabotimet bëhen nga pala tjetër”, ka thënë ai.

Rruga Press