Kosova dënon malazezin për përdorim sloganesh nacionaliste serbe
Gjykata Themelore në Kosovë dënoi shtetasin malazez Risto Jovanoviç me gjashtë muaj burg për incidente nacionaliste në festën e Vidovdanit, duke thënë që dënimi me burg mund të zëvendësohet me një gjobë në shumën prej 6,700 eurosh.
Gjykata Themelore e Prishtinës dënoi të mërkurën shtetasin malazez Risto Jovanoviç për nxitje të urrejtjes duke brohoritur parulla nacionaliste si “Vrit shqiptarët” gjatë një tubimi të besimtarëve ortodoksë serbë për të shënuar Vidovdanin (Dita e Shën Vitusit) në Gazimestan në Kosovë më 28 qershor.
Gjykata e dënoi atë me gjashtë muaj burg, por vendosi që Jovanoviç të paguante një gjobë prej 6,700 eurosh në vend që të vuante dënimin, gjë që mbrojtja e tij ra dakord të bënte.
“Jovanoviç është fajtor për akuzat e shkaktimit të përçarjes dhe intolerancës me dashje midis grupeve etnike që jetojnë në Kosovë më 28 qershor në Gazimestan, duke bërtitur ‘Vrit shqiptarët’, ‘Ne do ta lajmë Kosovën me gjak’ dhe ‘Kosova është Serbi’. Jovanoviç e ka të ndaluar të hyjë në Kosovë për pesë vjet me vendim të gjykatës”, tha gjykata.
Jovanoviç, i cili i kishte mohuar akuzat, u arrestua gjatë tubimit vjetor të Vidovdanit në monumentin Gazimestan pranë kryeqytetit të Kosovës, Prishtinë.
Vidovdani është një datë e rëndësishme fetare për serbët pasi është gjithashtu dita kur forcat osmane mundën mbretërinë mesjetare serbe në Betejën e Kosovës 1389.
Në eventin me rastin e Vidovdanit, policia e Kosovës i ndaloi pjesëmarrësit të shfaqnin flamuj, bluza dhe banderola me mesazhe nacionaliste, gjë që shkaktoi disa incidente, njëri prej të cilëve solli arrestimin e Jovanoviçit.
Media malazeze raportoi se ai u ndalua kur kundërshtoi forcat speciale të policisë së Kosovës teksa i kërkuan një murgeshe ortodokse të hapte çantën e saj, ndërsa mediat kosovare raportuan se ai ishte në mesin e një grupi njerëzish që po brohorisnin parulla nacionaliste.
Arrestimi i Jovanoviçit shkaktoi një protestë para ndërtesës së qeverisë malazeze dhe parlamentit m.ë 30 qershor, me demonstrues që u bën thirrje autoriteteve të garantojnë lirimin e tij.
Faqet malazeze të lajmeve Borba dhe IN4S raportuan të mërkurën se koalicioni më i madh në shumicën qeverisëse të Malit të Zi, Fronti Demokratik pro-serb, do të paguajë 6,700 euro për të siguruar lirimin e Jovanoviçit./balkaninsight/