Serbia mban peng nxënësit e Luginës, ende asnjë përgjigje për përdorimin e librave të gjuhës shqipe dhe matematikës

Qeveria e Serbisë po vazhdon avazin e saj të diskriminimit të shqiptarëve.

Kur kanë mbetur edhe pak ditë nga fillimi i vitit të ri shkollor, nxënësit e Luginës së Preshevës edhe më tutje nuk mund të kenë libra, kjo pasi Ministria e Arsimit në Serbi akoma nuk i ka kthyer përgjigje Këshillit Kombëtar Shqiptar për lejimin ose jo të përdorimit të teksteve gjuhës shqipe për vitin e I, II, III dhe IV dhe matematikës për vitin II dhe III në gjimnaz, shkruan Zeri.info.

Kështu ka bërë të ditur kryetari i Këshillit Kombëtar Shqiptar (KKSH), Nevzad Lutfiu.

Ai ka thënë se Ministria ka pasur afat prej 60 ditësh të kthejë përgjigje dhe ky afat ka kaluar qe dy javë.

“Më 14.08 janë bërë 60 ditë nga kërkesa dhe ende nuk kemi përgjigje. Për këtë dhe për të gjitha sfidat e arsimit shqip sot i dërgova kërkesë për takim ministres së Arsimit në Serbi, Slavica Gj. Dejanoviq. Kur është në pyetje të ndëshkohen shqiptarët, thirren në ligje, kur është në pyetje interesi i shqiptarëve i shkelin ligjet”, shkroi Lutfiu ndër të tjera.

Njoftimi i plotë i Lutfiut, pa ndërhyrje:

Shtëpia botuese e vetmja shqiptare në Serbi “Albas”, në koordinim me KKSH-në, ka aplikuar për lejen e përdorimit të teksteve “Gjuha shqipe për vitin e I, II, III dhe IV dhe matematika viti II dhe III (gjimnaz).

Sipas Ligjit për tekstet shkollore nr. 27/2018, Ministria e arsimit është dashur në afat prej 60 ditëve të kthejë përgjigje.

Më 14.08 janë bërë 60 ditë nga kërkesa dhe ende nuk kemi përgjigje.

Për këtë dhe për të gjitha sfidat e arsimit shqip sot i dërgova kërkesë për takim ministres së Arsimit në Serbi, Slavica Gj. Dejanoviq.

Kur është në pyetje të ndëshkohen shqiptarët, thirren në ligje, kur është në pyetje interesi i shqiptarëve i shkelin ligjet.

Rruga Press