Sondazhi i UNDP-së: Rritet kënaqshmëria e qytetarëve me punën e Qeverisë, Kuvendit dhe Drejtësinë

Programi i Kombeve të Bashkuara për Zhvillim (UNDP) në Kosovë do të lansoj sot edicionin e 24-të të Përmbledhjes Pulsi Publik.

Para se të lansohet anketa e plotë, UNDP-ja ka bërë të ditur se të dhënat e anketës së opinionit të Pulsit Publik të prillit 2023 tregojnë një rritje të kënaqshmërisë me punën e institucioneve kyçe ekzekutive, legjislative dhe gjyqësore në Kosovë në krahasim me anketën e mëparshme të kryer në nëntor 2022, transmeton Zeri.info.

Njëkohësisht, tri çështjet kryesore të raportuara gjatë kësaj ankete janë papunësia (32.7%), varfëria (20.1%), dhe inflacioni (11.6%).

“Anketat e opinionit për përmbledhjet e Pulsit Publik realizohen dy herë në vit dhe e pasqyrojnë opinionin e mbi 1,300 të anketuarve mbi 18 vjeç në Kosovë. Gjetjet e Përmbledhjes së Pulsit Publik #24 bazohen në të dhënat e mbledhura nga 4 deri më 25 prill 2023 në mbarë territorin e Kosovës, me numër të barabartë të meshkujve dhe femrave nga të gjitha grupet etnike që jetojnë në Kosovë”

“Projekti Pulsi Publik, i cili ka hyrë në vitin e 21-të të punës, financohet nga populli amerikan përmes Agjencisë së Shteteve të Bashkuara për Zhvillim Ndërkombëtar (USAID)”, thuhet në njoftim.

Rruga Press