Partia e Lirisë dërgon shkresën në KQZ: Kryetar i koalicionit “Bashkë Fitojmë” është Sali Berisha

Partia e Lirisë është treguar bujare me Sali Berishën, që është pjesë e koalicionit “Bashkë Fitojmë”, i regjistruar në zgjedhjet lokale të 14 majit, duke i dhënë postin drejtues të koalicionit.

Në shkresën dërguar në Komisionin Qendror të Zgjedhjeve, thuhet se kryetari i koalicionit është Sali Berisha.

Pasi humbi të drejtën për të përdorur logon e partisë Demokratike, Berisha vendosi që të hyjë në zgjedhje, duke krijuar koalicion me Partinë e Lirisë, të drejtuar nga Ilir Meta. Por, emri i këtij të fundit nuk është në fletën e votimit për këshillat bashkiakë, si drejtues i partisë.

Përfaqësuesi ligjor i Partisë Demokratike, Indrit Sefa, ankimoi vendimin e Ilirjan Celibashit, për të lënë bosh vendin ku duhet të ishte drejtuesi i këtij koalicioni. Këtë pasdite, teksa po shqyrtohej ankimimi në mbledhjen e Komisionit Ankimimeve dhe Sanksioneve, në KQZ mbërriti shkresa e PL-së, që thotë se drejtuesi i koalicionit është Berisha. Shkresa mban firmën e përfaqësuesit ligjor të koalicionit, Endrit Braimllari.

Rruga Press