Osmani: Lufta ka treguar se shpirti i popullit të Ukrainës është i pathyeshëm

“365 ditë vendosmëri dhe rezistencë e ukrainasve”. Kështu e ka nisur deklaratën presidentja e Republikës së Kosovës të premten kur është bërë 1 vit nga fillimi i agresionit rus në Ukrainë.

Duke e quajtur “luftë brutale dhe gjenocidale të Rusisë kundër Ukrainës”, Vjosa Osmani ka kujtuar jetët e humbura dhe shkatërrimin e madh që është shkaktuar që nga 24 shkurti i kaluar.

“Megjithatë përballë krimeve të tilla të tmerrshme, ne po ashtu kemi parë një komb që ngrihet me kurajë dhe vendosmëri për ta mbrojtur lirinë e tij dhe sovranitetin. Kjo luftë ka bashkuar botën demokratike, por mbi të gjitha ka treguar se shpirti i popullit të Ukrainës është i pathyeshëm. Pasi populli i Kosovës e di shumë mirë, brutaliteti dhe agresioni kurrë nuk mund ta pengojnë vullnetin e njerëzve për të qenë të lirë”, thuhet në deklaratën e Osmanit.

Presidentja ka shtuar se bashkë me botën demokratike, edhe Kosova, qëndron përballë tiranive dhe hegjemonive.

“E dimë se lufta e tyre është lufta jonë, dhe se triumfi i demokracisë, drejtësisë dhe lirisë në Ukrainë do të jetë fitore për demokracitë kudo në botë”.

Rruga Press