Studentët marshojnë kundër Asociacionit

Parlamenti i Studentëve të Universitetit të Prishtinës ka njoftuar se më 15 shkurt do të mbajë marsh kundër themelimit të Asociacionit të komunave serbe.

Në njoftimin e publikuar të enjten në Facebook, Parlamenti i studentëve të Universitetit “Hasan Prishtina” bëhet e ditur se grumbullimi do të nisë në orën 16:00 te Biblioteka Kombëtare. Marshi mban moton “Bashkë kundër Asociacionit”, ndërsa kjo datë është zgjedhur edhe për 53-përvjetorin e themelimit të Universitetit. Në njoftim, Parlamenti Studentor e ka cilësuar UP-në si vend të rezistencës, duke përmendur protestat e viteve 1968, 1981 e 1997.

“Ndonëse në rrethana krejtësisht të ndryshme, përsëri është i domosdoshëm mobilizimi e organizimi studentor për të kundërshtuar një të keqe që po provohet të instalohet brenda shtetit tonë. Asociacioni një etnik është në kundërshtim me Kushtetutën e Republikës sonë. Kështu sepse asociacioni i komunave me shumicë serbe nuk do të thotë më shumë të drejta për komunitetin serb, por më shumë ndikim të Serbisë mbi territorin e Kosovës”, thuhet në njoftim.

Të enjten në seancën e Kuvendit, kryeministri Kurti prezantoi gjashtë kushte nën të cilat u shpreh se do të pranonte formimin e Asociacionit. Kushtet që përmendi ishin që Asociacioni të jetë në përputhje me Kushtetutën, të ndërrojë emrin, të mos jetë monoetnik, të mos ketë kompetenca ekzekutive, të drejtat e pakicave të kenë parimin e reciprocitetit, të shuhen strukturat ilegale të Serbisë, që Asociacioni të jetë pjesë e marrëveshjes finale e të zbatohet pas njohjes e që Serbia t’i tërheqë letrat dërguar shteteve mosnjohëse në BE për të kundërshtuar aplikimin e Kosovës për anëtarësim në Bashkimin Evropian.

Rruga Press