Paralajmërimet për furnizim me tanke për Ukrainën shkaktojnë reagime “kërcënuese” nga Rusia

Rusia po paralajmëron për një përshkallëzim “jashtëzakonisht të rrezikshëm” nëse NATO vendos në Ukrainë armë të rënda si tanke luftarake dhe sisteme raketore me rreze të gjatë.

Sipas mediave të huaja, deklaratat paralajmëruese nga Kremlini vijnë përpara një takimi kryesor të donatorëve pasi vendet perëndimore konsiderojnë dërgimin e pajisjeve më të fuqishme ushtarake në Ukrainë me forcat ruse që intensifikojnë sulmet për të siguruar territorin.

Gjermania, në veçanti, është përballur me presion në rritje për të furnizuar Kievin me tanke dhe presidenti ukrainas Volodymyr Zelensky shprehu zhgënjimin për mos sigurimin e mjaftueshëm të armatimit të rëndë.

Që kur Mbretëria e Bashkuar njoftoi javën e kaluar se do të dërgojë tanke Challenger 2, Berlini është përballur me presion në rritje për të furnizuar me tanket e tij Leopard 2 ose të paktën t’u hapë rrugën të tjerëve – si Polonia – për të ofruar pajisjet e prodhimit gjerman nga stoku i tyre.

“Potencialisht, kjo është jashtëzakonisht e rrezikshme. Kjo do të nënkuptojë sjelljen e konfliktit në një nivel krejtësisht të ri, i cili, natyrisht, nuk do të jetë një shenjë e mirë nga pikëpamja e sigurisë globale dhe pan-evropiane”, citohet të ketë thënë para gazetarëve zëdhënësi i Kremlinit, Dmitry Peskov.

Të premten, Shtetet e Bashkuara do të mbledhin aleatët e tyre në bazën e tyre ajrore në Ramstein, Gjermani, për një raund të ri bisedimesh për mbështetjen ushtarake të Ukrainës.

Shefi i mbrojtjes i SHBA-së Lloyd Austin do të jetë pritës i takimit koordinues.

Ai tha se “ne do të rinovojmë angazhimin tonë të bashkuar për të mbështetur vetëmbrojtjen e Ukrainës për një kohë të gjatë” – por nuk përmendi pajisje të reja specifike.

Partnerët perëndimorë kanë ngritur pyetjen nëse Ukraina mund të përdorë armë me rreze të gjatë për të goditur thellë brenda territorit rus ose Krimenë – një gadishull që Moska e aneksoi në vitin 2014 – pavarësisht se Kievi premtoi se nuk do ta bënte këtë.

Dhe Peskov foli pasi ambasadori i Moskës në SHBA, Anatoly Antonov, tha se Rusia do të hakmerrej nëse Ukraina përdor armët e furnizuara nga Perëndimi për të synuar Rusinë ose Gadishullin e Krimesë.

“Duhet të bëhet e qartë për të gjithë: pavarësisht se çfarë armësh do t’i furnizojnë amerikanët apo NATO regjimit të Zelensky, ne do ta shkatërrojmë atë”, tha Antonov.

Por kërcënimet e Moskës nuk kanë përfunduar me kaq.

Më vete, ish-presidenti rus Dmitry Medvedev paralajmëroi se mbështetja e vazhdueshme e Perëndimit për Ukrainën mund të çojë në luftë bërthamore.

“Një fuqi bërthamore që humbet në një luftë konvencionale mund të provokojë shpërthimin e një lufte bërthamore”, citojnë mediat të ketë thënë Medvedev. “Fuqitë bërthamore nuk kanë humbur konfliktet e mëdha nga të cilat varet fati i tyre”.

Rruga Press