Një biznesmen dhe ish-oficeri i policisë, Abazoviç zbulon dy personat që duan ta vrasin

Pasi kishte deklaruar prej disa muajsh se disa persona duan ta eleminojnë fizikisht, kryeministri i Malit të Zi, Dritan Abazoviç ka dalë sot publikisht për të zbuluar me emra personat që e duan sipas tij të vdekur.

Abazoviç akuzoi ish-oficerin e lartë të policisë Zoran Lazoviç dhe biznesmenin Ranko Uboviç se duan ta ekzekutojne dhe “nuk duan para sepse nuk kanë nevojë për to”.

“Vetëm gojët e vdekura nuk flasin. Por ata u vonuan, unë paralajmërova dhe thashë ose do të vijnë tek unë ose do të vij tek ata. Është shumë vonë për ta”, tha Abazoviç.

Duke i  cilësuar Lazoviçin dhe Uboviçin si maja e piramidës kriminale në Malin e Zi, ai theksoi se është një nder i madh për të që ka drejtuar gishtin drejt tyre dhe ka goditur njerëzit “drejtpërdrejt në zemër”.

“Nuk ka problem, shihemi në gjykatë. Unë i kam paraqitur pretendimet e mia. Pretendimet e mia janë konfirmuar në një pjesë nga Europoli, në pjesën tjetër shpresoj se do të konfirmohen nga SDT në një periudhë të caktuar. Dhe zotërinj, problemi më i vogël. është se ata…Ju e dini që unë kurrë nuk e bëj veten viktimë, as nuk kam frikë nga njerëz të tillë, ata njerëz duan likuidimin tim”, tha Abazoviç.

Ndërkohë sipas “Vijesti”, Lazoviç, Uboviç dhe kompania “Bemax” ngritën padi duke kërkuar nga Abazoviç 21,000 euro secili për shkelje të të drejtave personale.

Rruga Press