Britania: Rusia ngarkon mercenarët në vijën e parë, ndërkohë që humbjet e këmbësorisë rriten

Rusia ka ngarkuar mercenarët që të mbajnë seksione të vijës së frontit në Ukrainë,një shenjë që tregon se ka mungesë të këmbësorisë luftarake, tha të premten Ministria e Mbrojtjes e Britanisë, ndërkohë që Kievi përshpejton një kundërofensivë në jug.

Por ministria britanike e mbrojtjes tha në një përditësim të inteligjencës se mercenarët e Wagner nuk kishin gjasa të kompensonin humbjen e njësive të rregullta të këmbësorisë ose të ndryshonin trajektoren e pushtimit rus.

“Ky është një ndryshim i rëndësishëm nga punësimi i mëparshëm i grupit që nga viti 2015, kur ai zakonisht ndërmori misione të ndryshme nga aktiviteti i rregullt ushtarak rus në shkallë të gjerë”, tha ministria në Twitter.

Wagner dhe Kremlini nuk ishin menjëherë të disponueshëme për komente jashtë orarit të rregullt të punës.

Zyrtarët në Kiev thanë të mërkurën se kishin vëzhguar një “rivendosje masive” të forcave ruse në jug, ku zyrtarët britanikë të mbrojtjes besojnë se Ushtria e 49-të e Rusisë, e vendosur në bregun perëndimor të lumit Dnipro, është e cenueshme.

Qyteti jugor i Khersonit, kyç për linjat e furnizimit tokësor të Rusisë nga Krimea e aneksuar nga Rusia, ishte tashmë praktikisht i shkëputur nga territoret e tjera të pushtuara nga Rusia, tha inteligjenca britanike të enjten.

Rajoni i Khersonit ra në duart e forcave ruse menjëherë pasi ato filluan atë që Moska e quan “një operacion special ushtarak” më 24 shkurt. Ukraina e përshkruan pushtimin rus si një luftë pushtuese e stilit perandorak.

Ushtria ukrainase ka përdorur sisteme raketore me rreze të gjatë të furnizuar nga Perëndimi për të dëmtuar rëndë tre ura përgjatë Dnipro-s në javët e fundit, duke e bërë më të vështirë për Rusinë furnizimin e forcave të saj në bregun perëndimor.

Ukraina tha se avionët e saj goditën pesë bastione ruse rreth Khersonit dhe një qytet tjetër aty pranë të enjten, fokusi i kundërsulmimit të saj më të madh gjatë luftës

Rusia bombardoi periferi të Kievit për herë të parë pas javësh të enjten. Pesëmbëdhjetë persona u plagosën kur raketat goditën instalimet ushtarake në rrethin Vyshhorod në skaj të kryeqytetit, tha në Telegram guvernatori rajonal Oleksiy Kuleba.

Sirenat e sulmit ajror u ndezën ndërkohë që Presidenti ukrainas Volodymyr Zelenskiy iu drejtua parlamentit së bashku me presidentin vizitues të Lituanisë, Gitanas Nauseda.

Sulmi shkatërroi ndjenjën e normalitetit që është kthyer në jetë në Kiev që kur forcat ruse braktisën përpjekjet për të pushtuar qytetin në javët e para të luftës, përballë rezistencës së ashpër të Ukrainës.

Më shumë se 10 raketa ruse goditën gjithashtu rajonin e Chernihiv-it në verilindje të Kievit, tha të enjten guvernatori rajonal Vyacheslav Chausov për TV ukrainas. Ashtu si Kievi, Chernihiv nuk ishte shënjestruar për javë të tëra.

Komanda e qarkut verior të forcave të armatosura të Ukrainës tha se më shumë se 20 raketa ishin lëshuar në rajonin Chernihiv në kufi me Rusinë nga një bazë në Bjellorusi – aleat i Rusisë.

Kundërsulmet e Ukrainës në jug vijnë ndërsa Rusia vazhdon të luftojë për kontrollin e të gjithë rajonit të industrializuar të Donbasit në lindje, që përfshin provincat Donetsk dhe Luhansk.

Forcat ruse bomabrduan qytetin e Bakhmut, i cili është cituar nga Rusia si objektivi kryesor në avancimin e saj përmes Donetsk-ut, katër herë të enjten, tha në Telegram guvernatori rajonal i Donetskut, Pavlo Kyrylenko. Të paktën tre persona u vranë dhe tre u plagosën, tha ai.

Ndërkohë që luftimet shpërthejnë, përpjekjet ndërkombëtare vazhduan të përpiqen të rihapin portet e Ukrainës dhe të lejojnë eksportet e drithit dhe mallrave të tjera.

Lejimi i kalimit të sigurt për dërgesat e grurit nga Ukraina duhet të lehtësojë mungesat që kanë lënë dhjetëra miliona njerëz në mbarë botën të përballen me rritjen e çmimeve të ushqimit dhe urinë.

Rusia dhe Ukraina arritën një marrëveshje javën e kaluar për të zhbllokuar eksportet e grurit nga portet e Detit të Zi, por shefi i ndihmës i OKB-së, Martin Griffiths tha se detajet “vendimtare” për kalimin e sigurt të anijeve ishin ende duke u përpunuar.

Griffiths shpresonte se dërgesa e parë e grurit nga një port ukrainas i Detit të Zi mund të ndodhte që të premten.

© Rruga Press