SHBA: Rusia po planifikon të aneksojë territore të tjera të Ukrainës

Rusia po thur plane për të aneksuar më shumë pjesë të Ukrainës, duke përsëritur lojërat që përdori në aneksimin e Krimesë në vitin 2014 për të kapur territor, ka thënë Shtëpia e Bardhë të martën.

Hapat që Rusia po planifikon mund të përfshijnë referendume “të rreme”, instalimin e zyrtarëve të paligjshëm, vendosjen e rublës ruse si monedhën zyrtare dhe detyrimin e qytetarëve ukrainas të aplikojnë për shtetësinë ruse, tha John Kirby, koordinatori i komunikimit në Këshillin e Sigurisë Kombëtare, raportoi CNN.

Kirby paralajmëroi se SHBA-ja do ta ndëshkojë Rusinë me sanksione shtesë për përpjekjet për të aneksuar më tej territorin ukrainas dhe tha se Shtëpia e Bardhë do të zbulojë ndihmën shtesë të sigurisë për Ukrainën këtë javë.

“Rusia ka filluar të nxjerrë një version të asaj që mund ta quani një libër aneksimi, shumë i ngjashëm me atë që pamë më 2014”, u tha Kirby gazetarëve në Shtëpinë e Bardhë. Ai tha se referendumet e mundshme mund të zhvillohen së shpejti.

“Kremlini nuk e ka bërë të ditur afatin kohor për referendumet, por përfaqësuesit rusë në këto territore pretendojnë se ato do të zhvillohen më vonë këtë vit, ndoshta në lidhje me zgjedhjet rajonale të shtatorit në Rusi”, tha Kirby, duke renditur rajonet e Khersonit dhe Zaporizhzhisë, së bashku me Donetskun dhe Luhanskun.

Zbulimi që Rusia mund të lëvizë për të aneksuar pjesë të territorit ukrainas është përpjekja më e fundit e SHBA-së për të parandaluar planet e Moskës duke i zbuluar ato para kohe. Presidenti Joe Biden dhe zyrtarë të tjerë paralajmëruan se Rusia po planifikonte një pushtim të Ukrainës në javët para se të fillonte në fillim të këtij viti.

Rruga Press