Majko edhe e fal shqiptarinë, por po ia preke Finlandën të bën gjëmën
Deputeti i Partisë Socialiste Pandeli Majko foli në Kuvend në lidhje me miratimin e protokolleve të NATO-s për aderimin e Suedisë dhe Finlandës në Aleancë.
Majko tha se ky është një akt solidaritet që tregon se kush prek sovranitetin e tyre ka prekur edhe Shqipërinë.
“Dua të bëj një koment të shkurtër. Mendoj se akti i sotëm i parlamentit për anëtarësimin e Suedisë dhe Finlandës në NATO nuk është vetëm moment kolektiv por akt i mirëfilltë solidariteti. Kush prek sovranitetin e tyre, prek edhe Shqipërisë.
Federata ruse po shkatërron ligjin ndërkombëtar. Ky moment kolektiv i të qëndruarit bashkë na bën edhe më të fortë. Me këtë pohim të sotëm, me gjithë polarizimin politik, vendimi i përbashkët është një gjest kuptimplotë dhe i rëndësishëm që ripohon qëndrimet e politikës shqiptare si anëtare e NATO-s. Ky është një nga aktet më të rëndësishme që ky parlament ka marrë sot”, tha ai.
Shumë mirë është që deputetë të Parlamentit të Shqipërisë të shprehen kundër agresionit rus në Ukrainë. Por ky reagim bëhet qasharak kur deputetë si Majko, që as nuk e hapën gojën kur flitej për shkëmbim territorial mes Kosovës e Serbisë, thonë tani se cënimi i sovranitetit të Finlandës a Suedisë është cënim i Shqipërisë.
A e di Majko, ish-kryeministër i Shqipërisë gjatë luftës së Kosovës, se preambuli nr.3 i kushtetusës së Shqipërisë, e detyron shtetin të kujdeset për shqiptarët kudo që janë?
A nuk është cënimi i sovranitetit të Kosovës cënim i Shqipërisë?
A nuk është spastrimi etnik dhe gjenocidi që po ushtrohet në Luginë të Preshevës cënim i Shqipërisë?
A nuk është mosnjohja e shqiptarëve në Maqedoni të Veriut si faktor shtetndërtues cënim i Shqipërisë?
A nuk është Ballkani i Hapur me Serbinë, pa njohur Kosovën shtet cënim i Shqipërisë?
A nuk është falja e detit Greqisë cënim i Shqipërinë?
Kërcënimet ndaj Rusisë nga Majko janë pikërisht shprehje e impotencës së tij politike dhe njerëzore për tu deklaruar dhe angazhuar me çështje tek të cilat ka ndikim real. Bën trimin me Rusinë, kur efekti i tij mbi luftën është zero dhe bën pulën për të drejtat e shqiptarëve, se nuk ia mban t’i mbrojë dot.
Rruga Press