Kriza e çmimeve, ulen depozitat në lekë, shqiptarët s’kanë ç’të kursejnë

Kriza e çmimeve ka prekur edhe depozitat. Pas rritjes në muajin janar, kursimet e shqiptarëve të mbyllur në banka janë tkurrur në mënyrë të vazhdueshme.

Të dhënat e Bankës së Shqipërisë tregojnë se në maj, niveli i depozitave arriti në 1,228 miliard lekë. Rënia është më e dukshme në monedhën vendase, duke u zvogëluar me 2.6% krahasuar me një vit më parë, ndërkohë që depozitat në euro kanë shënuar rritje me 4% që prej fillimit të vitit. 

Përballë rritjes së çmimeve të të gjitha produkteve ushqimore dhe karburanteve, familjet shqiptare e kanë të pamundur të kursejnë, ndërkohë që bizneset duket se i kanë paraprirë krizës.

Rritja e depozitave do të shtonte likuiditetin në banka, çka do t’iu mundësonte këtyre të fundit të tregoheshin më shumë aktive në dhënien e kredive.

Likuiditeti në sistemin bankar pritet të rritet më tej edhe nga zbatimi i amnistisë fiskale, ligj që qeveria e ka hedhur për konsultim publik dhe që pritet të hyjë në fuqi vitin e ardhshëm.

Rruga Press