Kërkesa e Macronit për prodhuesin e armëve: Punoni si të ishim në luftë
Presidenti i Francës, Emmanuel Macron, i ka kërkuar prodhuesit francez të armëve Nexter që të rrisë prodhimin, pasi i ka premtuar Ukrainës se do t’i dërgonte armë të tjera.
Një burim pranë Ministrisë Franceze të Mbrojtjes i ka thënë Reuters-it se Macron, përpara vizitës së tij në Kiev të enjten, i ka kërkuar Nexter-it “që të punojë njësoj sikur të ishte kohë lufte”, për të prodhuar sa më shpejt sistemet Caesar.
Franca do të dërgojë 6 sisteme artilerie Caesar në Ukrainë. Bëhet fjalë për një top 155 milimetrash i montuar në kamion që ka aftësinë të gjuajë gjashtë predha në minutë, në një distancë prej 40 kilometrash. Përveç kësaj, sipas AFP, ky sistem artilerie vlerësohet shumë nga Ukraina për shkak të saktësisë së tij.
Një tjetër nga pikat e forta të tij, sipas një komandanti ukrainas që është në luftim, është lëvizshmëria e tij. “Ky sistem është kryesisht shumë i menaxhueshëm dhe i lëvizshëm. Ky është një faktor shumë i rëndësishëm në një luftë bashkëkohore si kjo,” shpjegon ai.
I njëjti burim thekson se “falë kësaj arme, ne (Ukraina) kursejmë shumë kohë, kështu që armiku nuk mund të na sulmojë ose të kundërpërgjigjet shpejt”.