Kina kërcënon me veprime ushtarake

Pekini do të përdorë të gjitha mjetet e mundshme për të rimarrë kontrollin mbi Tajvanin, përfshirë ato ushtarake, tha ambasadori kinez në Francë, Lu Shaye.

“Ne nuk mund ta lëmë Tajvanin të pavarur”, këmbënguli Lu gjatë intervistës së tij të enjten në kanalin në YouTube, Livre Noir.

“Ne do ta rimarrim Tajvanin me të gjitha mjetet, duke përfshirë edhe ato ushtarake. Nëse nuk mund ta ribashkojmë vendin me mjete paqësore, çfarë tjetër na mbetet të bëjmë?” – theksoi ai, duke u bërë një tjetër zyrtar kinez që jep një paralajmërim të tillë.

Ambasadori ka fajësuar SHBA-në për nxitjen e tensioneve rreth Tajvanit dhe Ukrainës, ku po vazhdon pushtimi ushtarak i Rusisë.

“Amerikanët duan të fillojnë dy luftëra në botë: një në Evropë, tjetra në Azi,” tha ai.

Megjithatë, Lu hodhi poshtë çdo krahasim midis lëvizjes së mundshme të Kinës kundër Tajvanit dhe veprimeve ruse në Ukrainë. “Tajvani nuk është një shtet sovran. Ajo ka qenë një pjesë integrale e Kinës që nga kohërat e lashta,” vijoi ai.

Pekini ka rritur kohët e fundit aktivitetin e tij ushtarak detar dhe ajror rreth ishullit, duke thënë se kjo ishte e nevojshme për të penguar “aktivitetet e marrëveshjes së fshehtë” midis “forcave të pavarësisë së Tajvanit” dhe qeverisë së SHBA.

Tajvani ka qenë vetëqeverisës që nga viti 1949, por asnjëherë nuk e ka shpallur zyrtarisht pavarësinë e tij nga Kina. Pra, Pekini e konsideron ishullin prej 23.5 milionë banorësh si pjesë të territorit të tij nën politikën “Një Kinë”.

Teksa pajtohet me politikën e “Një Kine” në letër, Uashingtoni mban lidhje të forta jozyrtare me Taipein, duke i shitur armë ishullit dhe duke mbështetur rrekjen e tij për sovranitet. Pekini i ka dënuar vazhdimisht kontaktet e tilla si provokime dhe si ndërhyrje në punët e brendshme të Kinës.

Muajin e kaluar, presidenti Joe Biden premtoi se SHBA-ja do t’i përmbahet angazhimit të saj për të mbrojtur Tajvanin nëse Kina përfundimisht përdor forcën.

Disa zyrtarë amerikanë kanë pohuar gjithashtu se Pekini po monitoronte nga afër konfliktin në Ukrainë dhe po nxirrte përfundime, në përgatitje për një lëvizje të ngjashme kundër Tajvanit.

Rruga Press