Mori në mbrojtje Putinin duke mohuar masakrat në Ukrainë, “kryqëzohet” ish-kancelari gjerman Schroder, e duan jashtë partisë

Bashkëkryetarja e socialdemokratëve Saskia Esken ka sulmuar ish-kancelarin social-demokrat Gerhard Schroder pas intervistës në të cilën 78-vjeçari bëri të qartë se nuk ka ndërmend të lërë postet e tij në gjigantët rusë të energjisë.

“Ish-kancelari gjerman Gerhard Schroeder duhet të largohet nga partia e socialdemokratëve, mbrojtja e Vladimir Putin ndaj akuzës për krime lufte është thjesht absurde”.

Kështu deklaroi bashkëkryetarja e SPD-së, Saskia Esken. Ditët e fundit, politikani 78-vjeçar, kryesues i bordit mbikqyrës të Nord Stream dhe grupit të naftës Rosneft si dhe kandidat për në krye të Gazprom, e bëri të qartë në një intervistë për New York Times se nuk ka asnjë qëllim të largohet nga postet e tij.

Schroeder tha se do ta bënte një gjë të tillë, vetëm nëse Moska vendos të shkurtojë gazin për Gjermaninë ose Evropën.

Intervista e Schroeder- Duke folur për gazetën amerikane, ish-kancelari përsëriti gjithashtu se është gati të ndërmjetësojë sërish me mikun e tij Putin.

“Presidenti rus do të donte t’i jepej fund konfliktit, “por duhen sqaruar disa pika”, tha ai, duke shtuar se hipoteza e krimeve të luftës duhet të hetohet.

Schroeder nuk beson se urdhri për masakrën e Buchas ka ardhur nga lart.

SPD: Schroeder vepron si biznesmen dhe mbron Putinin

Pozicionimi i ish-kancelarit është kritikuar ashpër në Gjermani dhe është konsideruar si “absurd” nga Esken.

“Schroeder ka vite që vepron si biznesmen dhe ne duhet të ndalojmë ta perceptojmë atë si një burrë shteti apo ish-kancelar,” tha bashkë-presidentja e SPD në një intervistë për radio Deutschlandfunk.

“Ai i fiton paratë e tij duke punuar për kompanitë ruse dhe mbrojtja e Vladimir Putin ndaj akuzave për krime lufte është thjesht absurde. Heqja dorë nga mandatet në biznesin rus do të ishte e nevojshme për të shpëtuar reputacionin e tij si një ish-kancelar i suksesshëm. Fatkeqësisht, ai nuk e ndoqi këtë këshillë.”

Kërkesat për përjashtim nga partia -Drejtuesit e SPD-së i kishin dërguar tashmë një letër dy muaj më parë, ku i kërkonin të jepte dorëheqjen, por ish-kancelari nuk ka lëvizur asnjë centimetër në këtë drejtim.

Ndërkohë, nga socialdemokratët, nën presion për këtë çështje edhe nga konservatorët e CDU-së, të cilët kanë kërkuar përjashtimin e tij, në seksionin e Saksonisë së Poshtme janë dorëzuar 14 kërkesa që Schroeder të përjashtohet nga partia. Megjithatë, procedura është e gjatë dhe e ndërlikuar, ka shpjeguar vetë Esken dhe është ngritur një komision të posaçëm që do të merret me të.

Krybashkiaku i Kievit: Schroeder bashkëpërgjegjës për masakrën e grave dhe fëmijëve ukrainas

Reagim të ashpër ndaj ish-kancelarit gjerman pati edhe nga kryetari i bashkisë së Kievit, Vitali Klitschko.

“Nëse Schroeder vazhdon të mbledhë miliona nga krimineli i luftës i Kremlinit si lobist, duhet menduar për ngrirjen e llogarive të tij dhe SHBA-ja mund ta vendosë atë në listë për fluturim. Në dritën e propagandës së tij për Kremlinin, njeriu pyet veten pse jeton në Hanover dhe jo në Moskë? Nëse ai vazhdon të punojë për vrasës, mund ti thuhet vetëm: lëvizni në Moskë!”, shtoi Klitschko.

Ai beson se është “bashkëpërgjegjës për masakrën e grave dhe fëmijëve ukrainas”.

Rruga Press