Krimet zgjedhore në Shqipëri, vetëm dy të dënuar për ’25 prillin’

Në SPAK dhe prokuroritë e rretheve u dërguan 291 denoncime për zgjedhjet e 25 prillit, por vetëm 2 persona janë dënuar.

Nga një raport i Qendrës për Çështje të Informimit Publik del se 115 raste denoncimesh për shit-bleje votash i kaluan SPAK-ut, kurse 176 prokurorive së rretheve.

Raporti vlerëson gjithashtu se Prokuroria e Posaçme, SPAK, ka administruar rreth 115 kërkesa për hetim nga partitë politike dhe prokuroritë e rretheve, nga të cilat për 57 raste nisi hetimet.

165 kallëzime janë bërë nga subjektet zgjedhore dhe 9 nga qytetarët, 40 janë referime nga Policia e Shtetit dhe 18 janë kërkesa për hetim nga Presidenti i Republikës.

Ndëshkueshmëria e krimeve zgjedhore vlerësohet shumë e ulët në raport me kallëzimet që u paraqiten në Zgjedhjet e 25 Prillit 2021.

Deri në dhjetor 2021, vetëm një çështje penale e hetuar nga SPAK mori vendim fajësie në Gjykatë. Çështja penale ka qenë në ngarkim të dy punonjësve të Bashkisë Dibër, të cilët u kapën në flagrancë me shuma monetare dhe karta identiteti në makinë.

Deri në fund të vitit 2021, SPAK përfundoi gjithashtu hetimet dhe dërgoi në gjyq dosjen e shitblerjes se votës për të cilën  akuzua Etjon Joka i cili garoi si kandidat për deputet në zgjedhjet e 25 Prillit 2021 në Qarkun Tiranë.

Rruga Press