Kurbini vazhdon pa ujë të pijshëm, ujësjellësi i ri nuk ka përfunduar

Dy vjet më parë ministrja Belinda Balluku dhe ish-drejtori i AKUM, Alqi Bllako inauguruan nisjen e punës për ujësjellësin e ri të Laçit, duke premtuar 24 orë ujë në ditë për banorët e Kurbinit. Por, dy vjet më pas, puna nuk ka përfunduar, pavarësisht se ujësjellësi duhet të ishte gati që në mars të këtij viti sipas afateve, duke lënë ende pa ujë 30 mijë familje të Laçit.

Ujësjellësi i Laçit nisi të ndërtohej në mars të vitit 2020, dhe sipas afatit të punimeve, duhet të kishte përfunduar brenda 24 muajve. Puna për investimin prej 500 milion lekësh u inspektua dy vjet më parë dhe nga Ministrja Belinda Balluku e shoqëruar nga ish-drejtori i AKUM, Alqi Bllako, tashmë i arrestuar për aferën e inceneratorëve.

Të dy, Balluku dhe Bllako premtuan se do t`u përmbaheshin afateve për ndërtimin e ujësjellësit të ri, me qëllim që 30 mijë familje në Laç të furnizoheshin me ujë të pijshëm 24 orë dy vjet më pas. Por, ky premtim ende nuk është mbajtur.

Kjo çezmë e ndërtuar në një nga rrugët hyrëse të qytetit të Laçit, u shërben mijëra banorëve, të cilët çdo ditë vijnë për të mbushur ujë me bidonë. Banorët shprehen se problematika e mungesës së ujit vijon prej dekadash.

SYRI TV u interesua dhe në bashkinë e Kurbinit, ku zyrtarë të saj jashtë kameras shprehen se ujësjellësi do të përfundojë së shpejti, por pa dhënë afate.

Rruga Press