Edhe Lajçaku pajtohet: BE-ja të mbajë premtimin për liberalizimin e vizave për Kosovën

“Pajtohem plotësisht me vlerësimin tuaj”, i ka thënë emisari i posaçëm i Bashkimit Evropian për dialogun Kosovë-Serbi, Miroslav Lajçak, ish-ministrit shtetëror gjerman për Evropën, Michael Roth, që BE-ja ta mbajë premtimin për liberalizimin e vizave për Kosovën.

Të martën, Roth pas takimit me Lajçakun, kishte renditur premtimet e BE-së që ende s’janë realizuar. Pasi kishte thënë se BE-ja duhet të nisë bisedimet për pranimin e Shqipërisë dhe Maqedonisë së Veriut, ai kishte theksuar se BE-ja duhet ta mbajë edhe premtimin për liberalizim të vizave për Kosovën.

Përkrahje për këtë, tani ka marrë nga Lajçaku, që ka shpërndarë postimin e Rothit në Twitter me fjalinë e shkurtër se pajtohet me qëndrimin e ish-ministrit gjerman.

Roth kishte shërbyer në postin e ministrit shtetëror për Evropën në periudhën 2014-2021, nën Angela Merkelin.

Premtimi për liberalizim ka vjet që i është dhënë kosovarëve. Së fundmi, ishte votimi i demarkacionit me Malin e Zi në vitin 2018 që u konsiderua kriteri i fundit i përmbushur për liberalizimin.

Rruga Press