Lufta në Ukrainë, Boris Johnson: Putini ka kaluar vijën e kuqe

Kryeministri i Mbretërisë së Bashkuar Boris Johnson ka folur për radion LBC në Mbretërinë e Bashkuar përpara mbërritjes së tij në samitin e jashtëzakonshëm të NATO –s që mbahet sot në Bruksel. Ai ngriti mundësinë e ndërmarrjes së veprimeve mbi rezervat e arit të Rusisë. Sipas Johnson, Putin ka kaluar tashmë vijat e kuqe.

“Fakti i madh që bota e di tani është se populli ukrainas do të luftojë për vendin e tij. Ata besojnë në vendin e tyre. Ata e duan vendin e tyre dhe do ta mbrojnë atë. Kjo ishte diçka që nuk e dinim vërtet një muaj më parë. Tani është absolutisht e qartë. Kjo ka ndryshuar gjeopolitikën.

Do të thotë se ne kemi për detyrë t’i ndihmojmë ata. Ne kemi për detyrë t’i ndihmojmë ata të mbrojnë veten dhe të dashurit e tyre. Ne kemi dërguar tashmë rreth 4000 armë antitank. Do të dërgojmë shumë më tepër gjatë ditëve të ardhshme, 6000 raketa të tjera dhe shumë të tjera përveç kësaj.

Dhe pika që do të them sot është se ai tashmë ka kaluar një prag barbarie në mënyrën se si sillet. Njerëzit flasin për vija të reja të kuqe për armët bërthamore kimike, biologjike, taktike apo çfarëdo.

Për mua, vija e kuqe tashmë është kapërcyer. Ai po bombardon, pa dallim, qendrat civile. Ai po shkakton një numër të madh viktimash në popullsi krejtësisht të pafajshme.

Duhet të bëjmë më shumë. A mund të bëjmë më shumë për ta ndaluar atë të përdorë rezervat e tij të arit, për shembull, përveç rezervave të parave të tij?

Sa më shumë presion të bëjmë tani, veçanërisht për gjëra si ari, besoj se aq më shumë mund ta shkurtojmë luftën”, tha kryeministri britanik.

Johnson është nisur nga Britania e Madhe për në Bruksel.

Rruga Press