Rritja e çmimeve s`ndalet/ Vaji shkon 329 lekë, rritet prapë mielli. Pensionistët: Atje vdesin nga lufta, këtu nga uria

Çmimet e produkteve të shportës kanë pësuar sërisht rritje në një hark kohor prej vetëm dy javësh. Kjo situatë po bëhet gjithmonë e vështirë për qytetarët, të cilët shprehen se e shohin veten të pambrojtur përballë rritjes së çmimeve. Pensionistët shprehen se janë më të diskriminuarit dhe se paketa e ndihmës e ofruar nga qeveria, është e pamjaftueshme.

Për më pak se dy javë çmimet e produkteve të shportës kanë pësuar rritje, ndërsa ajo që bie në sy është rritja e pakontrolluar e çmimit të vajit.

Në një vëzhgim të kryer nga Ora News, 12 ditë më parë çmimi i vajit ishte 250 lekë.

Të martën e datës 15 mars, çmimi i vajit varion midis 295 dhe 329 lekë.

Rritje kanë pësuar edhe produktet ushqimore si mielli, me 25-40 lekë. Gjithashtu sheqeri ka pësuar një rritje prej 5 lekësh.

Këtë situatë qytetarët e shohin të lidhur me luftën në Ukrainë.

“Ata vdesin nga lufta, ne nga uria.”

“Çmimet në stratosferë, çdo produkt.

Pensionistët shprehen se janë më të pambrojturit, ndërsa paketën e ndihmës të ofruar nga Kryemistri e cilësojnë të pamjaftueshme.

“Jemi pjesa me diskriminuar, 30 mijë lekëshi është shumë qesharake.”

“S’ka më keq, kjo qeveri më poshtë nuk ka ku ta çojë këtë popull. Është katandisur në ditën e fundit. Ku na dalin 30 mijë lekë, sot kam prishur 20 mijë lekë direkt.”

“Ne 40 mijë lekë i duam ilaçe, nuk pyet njeri për ne.”

“150 mijë pagova dritat unë dhe çfarë të ha?”

Përballë kësaj situate, qytetarët kërkojnë edhe njëherë që qeveria të marrë përgjegjësitë që i takojnë për të lehtësuar sadopak situatën e krijuar nga rritja e çmimeve./ora/

Rruga Press