Rrëfimi prekës i nënës në Kiev: Fëmijëve u them se frika është ndjesi e mirë, tani dallojnë largësinë e raketave
Populli ukrainas vijon të vuaj pasojat e rëndë të luftës, që Rusia ka nisur kundër tyre. Në ditën e 8 të luftimeve të ashpra, Kievi duket se është rrethuar nga pushtuesit rus, megjithatë shumë banorë kanë zgjedhur të mos largohen por të përballen me agresorët.
Një nënë ukrainase, e strehuar në Kiev me tre fëmijët e saj, pesë dhe shtatë vjeç dhe një fëmijë katër muajsh – thotë se është e pamundur t’u fshihet tmerri i situatës.
Ajo thotë për BBC Radio 5 Live: “Qyteti im është i rrethuar me trupa dhe tanke ruse, të largohesh apo të qëndrosh është po aq e rrezikshme, nuk ka vend në Ukrainë ku mund të jesh absolutisht i sigurt tani.
“Vendosa se është më mirë të qëndroj me fëmijët e mi këtu, kjo është shtëpia ime”.
“Thjesht ndjej se duhet të jem këtu, në shtëpinë time, sepse kush do ta mbrojë nëse nuk jam këtu? Tani duhet t’u tregoj fëmijëve të mi se si të mbrojnë kufijtë e mi personal dhe çfarë më takon mua”.
“Po përpiqem të jem e fortë dhe nuk e fsheh që kam frikë. Unë u them atyre se është mirë të kesh frikë, kam frikë gjithashtu”.
“Ne jemi në një situatë ku është e pamundur t’u fshehim gjë fëmijëve”.
Ajo shton se kur dëgjuan shpërthime në Kiev, ajo dhe bashkëshorti i saj e kuptuan se “kishte filluar dhe ne nuk mund ta fshehim”.
“Ne u thamë atyre se Rusia ka sulmuar dhe ne jemi në luftë dhe ju duhet të dini se si të jeni sa më të sigurt që të jetë e mundur,” shpjegon ajo.
Dhe nëna e tre fëmijëve thotë se i ka mësuar fëmijët e saj se si të dallojnë nëse një raketë është afër apo larg nga zëri.
“Ky është realiteti ynë, duhet të përballemi me të”, thotë ajo.
“Në ditën e dytë të luftës, burri im iu bashkua njësisë së mbrojtjes lokale – ai është civil, por nuk kishte zgjidhje tjetër – është thjesht surreale.
Gjithçka këtu ishte normale, nuk kishte asgjë në ajër, ishte një kohë e qetë. Papritur ne u sulmuam për asgjë.”
Ajo shton: “Putini është një qenie njerëzore, ai është thjesht një burrë, çfarë e bën atë të japë urdhër për të vrarë mijëra njerëz?”.
Rruga Press