Bimët çelën një muaj më herët për shkak të ndryshimeve klimatike

Ndryshimet klimatike po bëjnë që bimët në Mbretërinë e Bashkuar të lulëzojnë mesatarisht një muaj më herët, sipas një studimi. Ashtu si rënia e gjetheve të vjeshtës po vonohet nga moti i ngrohtë, lulet shfaqen më herët në pemë dhe shkurre. Por ndërsa disa mund t’i mirëpresin këto lulëzime të parakohshme, shkencëtarët po paralajmërojnë për rreziqet.

Ata thonë se nëse trendi vazhdon, ka efekte të dëmshme për zogjtë, insektet dhe ekosistemet. Mospërputhja ekologjike mund të fillojë dhe do të kishte një efekt dramatik “në funksionimin dhe produktivitetin” e natyrës dhe bujqësisë, tha studiuesi kryesor, profesor Ulf Buntgen i Universitetit të Kembrixhit. “Sistemi ynë klimatik po ndryshon në një mënyrë që ndikon ne dhe mjedisin tonë,” tha ai për “BBC News”.

Ngrohja globale po bën që pranvera të vijë herët dhe vjeshta të vijë vonë në shumë vende dhe jo të gjitha bimët dhe kafshët po përshtaten me të njëjtin ritëm. Shkencëtarët paralajmërojnë se nëse speciet dalin jashtë sinkronizimit me njëra-tjetrën, kjo mund të ketë pasoja katastrofike që është një koncept i njohur si mospërputhja ekologjike. Poleni, nektari, farat dhe frutat e bimëve janë burime të rëndësishme ushqimore për insektet, zogjtë dhe kafshët e tjera të egra.

Dhe nëse lulet shfaqen shumë herët, ato mund të goditen nga ngrica, duke dëmtuar të korrat e pemëve frutore. Studimi shqyrtoi qindra mijëra vëzhgime të datave të lulëzimit të parë të pemëve vendase, shkurreve, barishteve të regjistruara në një bazë të dhënash të shkencës qytetare, të njohur si Kalendari i Natyrës.

Studiuesit e Kembrixhit krahasuan datat e para të lulëzimit të 406 specieve bimore me të dhënat klimatike, duke gjetur se lulëzimi i hershëm është i lidhur ngushtë me rritjen e temperaturave globale raporton “BBC”. Për të balancuar numrin e vëzhgimeve, ata ndanë të dhënat e plota në të dhëna deri në vitin 1986 dhe nga viti 1987 e tutje, duke gjetur se data mesatare e lulëzimit të parë nga viti 1987 në 2019 ishte pothuajse një muaj më herët se data mesatare e lulëzimit të parë nga 1753 deri në 1986. Bimët lulëzuan 32 ditë më parë.

Duke komentuar studimin, të botuar në revistën, Proceedings of the Royal Society B, profesori John David, që është drejtuesi i Shoqërisë Mbretërore të Hortikulturës, tha se bimët po lulëzojnë më herët si rezultat i ngrohjes globale, ashtu si rënia e gjetheve në vjeshtë po vonohet nga moti më i ngrohtë.

Rruga Press