Kurti synon që brenda mandatit t’u sigurohet banim i përballueshëm 4 mijë familjeve

Kryeministri i Kosovës, Albin Kurti, ka përsëritur premtimin e tij të fushatës për ndihmë për banim social. Ai ka thënë se brenda mandatit, Qeveria synon t’ua mundësojë banimin e përballueshëm katër mijë familjeve me programin për banim social.

Deklarata e Kurtit dhe prezantimi i koncept-propozimit për Programin e Banimit Adekuat Social për Kosovë u bënë në tryezën për Programin e banimit adekuat social.

Kurti ka thënë se janë dy skema që do t’ua mundësojnë familjeve përfituese të bëhen me banesa. Njëra është për familjet që mund të paguajnë këste nga 120 euro për 120 muaj dhe tjetra për 150 euro për maksimalisht 150 muaj.

Ai ka thënë se kostoja vjetore e këtij projekti është rreth 22 milionë euro. Ka thënë se shuma gradualisht do t’i kthehet institucionit që parashihet të themelohet dhe ngarkohet me zbatimin e projektit.

Në fjalimin e tij, Kurti është ankuar se shumë komplekse banesore të ndërtuara viteve të fundit kanë mbetur në përqindje të madhe të pashfrytëzueshme.

“Ne kemi shumë banesa të ndërtuara dhe njëkohësisht edhe shumë familje në nevojë për strehim. Banesat private janë të papërballueshme për një përqindje të lartë të popullsisë, ndërsa vetëm 0.3% e banesave ekzistuese janë banesa sociale. Sipas statistikave, kërkesat për banim social shkojnë në mbi 9.000 njësi banesore shtesë, të cilat aktualisht as niveli qendror e as niveli lokal nuk i ka në dispozicion. Ndërtesat dhe infrastruktura e ndërtuar ndër vite nuk kanë adresuar siç duhet nevojat e shoqërisë”, ka thënë Kurti teksa ka shtuar se tashmë ka ndarje në lagje të zhvilluara e të mbyllura, të ndara nga familjet me të ardhura të ulëta.

Ai ka thënë se programet komunale kanë kontribuar në promovimin e “segregimit social”.

“Në njësitë ekzistuese banesore duhet të intervenohet, që të përmirësohen kushtet e banimit, të revitalizohen dhe të kthehen në zona, jo vetëm të banueshme, por zona që ofrojnë zhvillim personal dhe profesional të banorëve, ashtu që të destigmatizohen dhe degetoizohen. Këto programe komunale të banimit nuk e kanë konsideruar as shkallën e as natyrën e krizës dhe madje as nevojën për veprim urgjent. Për këtë, nevojitet qasje e re ndaj banimit social dhe për zhvillimin e qëndrueshëm urban. Qeveria është duke punuar në këtë drejtim dhe programin e banimit social e kemi përfshirë në Programin e Qeverisë së Republikës së Kosovës për vitet 2021-2025. Brenda mandatit, ne synojmë të krijojmë programin për banim social, si dhe të mundësojmë banim të përballueshëm për 4 mijë familje. Kjo do të arrihet përmes skemës ‘120×120’ dhe ‘150×150’, ku familjet përfituese do të bëhen pronarë të banesave me këste mujore prej vetëm 120 respektivisht 150 eurove maksimumi dhe për një periudhë kohore prej jo më shumë se 120, përkatësisht 150 muajve. Kostoja vjetore e këtij projekti është rreth 22 milionë euro, mirëpo kjo shumë gradualisht i kthehet institucionit, i cili do të themelohet dhe ngarkohet me implementimin e projektit”, ka thënë ai.

Kurti ka thënë se tashmë ka pasur diskutime për studimin e fizibilitetit për këtë program.

“Është detyrë e jona që në një të ardhme të afërt të krijojmë mundësi për çdo qytetar që ka nevojë, të ketë qasje në shtëpi të sigurt e me cilësi të mirë, me kushtet për jetë të dinjitetshme, zhvillim personal e profesional. Përtej sigurimit të infrastrukturës fizike, programi i banimit do të përcaktojë edhe rrugën tonë të përbashkët drejt qëndrueshmërisë shoqërore, ekonomike dhe mjedisore”, ka deklaruar më tej ai.

Rruga Press