Shitje rekord në ankand, fanellat e Jordan, Kaepernic dhe Obama shiten për 640 mijë $

Fanellat historike të sportistëve Michael Jordan, Colin Kaepernick dhe ish-presidentit amerikan Barack Obama janë shitur me shifra rekord në një ankand të mbajtur ditën e premte.

Fanella zyrtare e Shoqatës Kombëtare të Basketbollit që i ishte dhënë Jordan-it ditën kur nënshkroi me Chicago Bulls në vitin 1984 u shit për 320 mijë dollarë, çmimi më i lartë i paguar ndonjëherë për një fanellë.

Jordan e mbajti fanellën bardhekuq, që kishte emrin e tij dhe numrin 23, në konferencën e parë për shtyp si anëtar i Bulls-ave.

Ai u kthye në legjendën e ekipit, që fitoi 6 tituj kampion gjatë viteve ’90.

Ndërkohë, fanella me numrin 7 e veshur nga ish-lojtari i futbollit amerikan Colin Kaepernick në vitin 2011, gjatë ndeshjes së debutimit me San Franciskon, u shit për 128 mijë dollarë, duke e bërë fanellën më të shtrenjtë të Ligës Kombëtare të Futbollit që shitet në një ankand.

Kaepernick ka qenë një nga figurat sportive më premtuese por edhe kontradiktore në Shtetet e Bashkuara.

Vendimi i tij në vitin 2016 për t’u gjunjëzuar gjatë himnit kombëtar në shenjë proteste ndaj brutalitetit policor frymëzoi lëvizjen Black Lives Matter.

Gjithashtu, një tjetër fanellë basketbolli, e veshur nga ish-presidenti Obama në 1979-n, gjatë viteve të tij në shkollën Punahou në Hauai u shit për 192 mijë $, një rekord për një fanellë shkolle të mesme.

Edhe kjo fanellë mbante numrin 23, sikurse ajo e yllit Michael Jordan.