50 viktima të gjenocidit do të varrosen në përkujtimoren e Srebrenicës

Eshtrat e 50 viktimave të masakrave të boshnjakëve të korrikut 1995 nga forcat serbe të Bosnjës, duke përfshirë tre të mitur, do të varrosen në përkujtimoren që do të mbahet me rastin e 27-vjetorit të gjenocidit javën e ardhshme.

Instituti i Personave të Zhdukur të Bosnje dhe Hercegovinës tha se 50 viktima të gjenocidit do të prehen në një funeral kolektiv në Qendrën Përkujtimore të Srebrenicës më 11 korrik, ditën e përkujtimit të përvjetorit të vrasjeve masive në 1995.

Saha Bumbuloviç tha se në mesin e atyre që do të varrosen do të jetë edhe babai i saj Adil Selimoviç, i cili u vra më 13 korrik 1995 në moshën 59-vjeçare.

Bumbuloviç tha se rreth 80 për qind e eshtrave të babait të saj janë gjetur.

“Në një farë mënyre jam e lumtur që ai do të gjejë prehje, por në të njëjtën kohë është e vështirë për mua pasi humba të gjithë të dashurit e mi”, tha Bumbuloviç.

Ajo shpjegoi se 21 nga të afërmit e saj ishin në mesin e rreth 8,000 boshnjakëve nga Srebrenica që u vranë nga forcat serbe të Bosnjës – një krim që është klasifikuar si gjenocid nga gjykatat ndërkombëtare.

“Motra dhe kunata ime janë marrë bashkë me fëmijët e tyre dhe nuk janë gjetur kurrë. Që atëherë, ata janë zhdukur pa gjurmë. Askush nuk i ka gjetur kurrë”, tha ajo Bumbuloviç.

Instituti i Personave të Zhdukur tha se tre të mitur do të jenë në mesin e viktimave që do të varrosen në përvjetorin e këtij viti. Më i riu është Salim Mustafiç, i cili ishte 16 vjeç kur u vra, ndërsa Vahid Smajloviç dhe Elvir Muminoviç ishin nga 17 vjeç.

Zëdhënësja e Institutit të Personave të Zhdukur, Emza Fazliç tha se deri më tani eshtrat e 6,671 personave janë varrosur në Qendrën Potocari të Srebrenicës. Varrimet e së hënës do ta çojnë numrin në 6,721.

Sipas Institutit të Personave të Zhdukur, eshtrat e rreth 1,200 viktimave të tjera të Srebrenicës nuk janë gjetur ende.

Rruga Press