“Zgjidhje me dy shtete” – Parlamenti Evropian miratoi rezolutën për njohjen e shtetit të Palestinës

Asambleja e BE-së votoi në favor të një rezolute jo-detyruese, të dakordësuar nga grupet e shumicës qendrore.

Parlamenti Evropian miratoi një rezolutë që u bën thirrje shteteve anëtare të BE-së të “shqyrtojnë njohjen e Shtetit të Palestinës, me qëllim arritjen e zgjidhjes me dy shtete”.

Teksa Parlamenti ka mbështetur “njohjen në parim të shtetësisë palestineze” në të kaluarën, kjo rezolutë e re duket të jetë një thirrje më e drejtpërdrejtë për qeveritë kombëtare për të vepruar.

Rezoluta u miratua me 305 vota pro, 151 kundër dhe 122 abstenime.

Sipas eurodeputetit socialist italian Nicola Zingaretti, kjo ishte rezultat i negociatave të plota midis grupeve politike mbi amendamente të ndryshme.

Votimi ishte i gjatë dhe i tensionuar, dhe anëtarët e Parlamentit madje kërkuan pushim për të kontrolluar votat e amendamenteve mbi Gazën, përpara se të vazhdonin me votimin përfundimtar mbi rezolutën në tërësi.

Një pikë tjetër e diskutueshme në rezolutë ishte përdorimi i termit “gjenocid” për të përshkruar sulmet e Izraelit ndaj Gazës.

Formulimi “veprime gjenocidale” si përfundim u refuzua dhe u hoq nga teksti. 

Rezoluta e miratuar mban titullin “Gaza në buzë të greminës: Veprimi i BE-së për të luftuar urinë, nevoja urgjente për të liruar pengjet dhe për të ecur drejt një zgjidhjeje me dy shtete”, duke theksuar urgjencën e ndërhyrjes humanitare dhe kërkesën për një zgjidhje diplomatike të konfliktit.

Rruga Press