Zelensky thotë se “e ardhmja e sigurisë evropiane” po vendoset tani në Ukrainë
Presidenti ukrainas Volodymyr Zelensky tha në një konferencë për shtyp në Kiev se “e ardhmja e sigurisë evropiane po vendoset tani, këtu në Ukrainë”.
Duke folur së bashku me liderët polakë dhe lituanezë, Zelensky tha:
“Ne jemi unanim në vlerësimin tonë për krimet e Federatës Ruse. Ky është një akt tjetër agresioni kundër Ukrainës, sovranitetit të saj, integritetit tonë territorial.”
Zelensky bëri thirrje për një regjim të ashpër sanksionesh kundër Rusisë.
Presidenti i SHBA-së Joe Biden tha të martën se SHBA-ja do të sanksionojë institucionet financiare dhe oligarkët e Rusisë. Mbretëria e Bashkuar, Bashkimi Evropian, Kanadaja, Australia dhe Japonia gjithashtu njoftuan sanksione të reja ndaj Rusisë.
“Prania ushtarake e Federatës Ruse në territorin e pushtuar të Donbasit është fshehur pas uniformës separatiste”, tha ai.
“Dhe tani ne shohim se ky është një largim i njëanshëm nga marrëveshjet e Minskut”, shtoi ai, duke iu referuar njoftimit të Rusisë se marrëveshja e Minskut – e krijuar për të sjellë paqe në rajonet lindore të Ukrainës – nuk zbatohet më.
“Ky është një minim i përpjekjeve ukrainase dhe ndërkombëtare për të rregulluar situatën në Donbasin ukrainas”, tha Zelensky. “Përgjigja e bashkësisë ndërkombëtare ndaj këtij krimi duhet të jetë vendimtare, e menjëhershme dhe e ashpër”.
“Ne duhet të ndalojmë plotësisht projektin Nord Stream, i cili është një armë që tashmë po përdoret kundër Ukrainës dhe Evropës”, shtoi ai.
Dje, Gjermania tha se ndaloi certifikimin e tubacionit prej 11 miliardë dollarësh, 750 milje që lidh Rusinë drejtpërdrejt me Gjermaninë. Projekti Nord Stream 2 përfundoi në shtator, por ende nuk ka marrë dritën jeshile përfundimtare nga rregullatorët gjermanë.
Duke qëndruar pranë Zelenskit, presidenti polak Andrzej Duda tha: “Ne të gjithë po ecim në rrugën e ngushtë midis paqes, zhvillimit të mëtejshëm të qëndrueshëm dhe luftës. Polonia dënon vendimin e Putinit për njohjen.”
©Rruga Press