Zelensky: Putini të kthejë fëmijët ukrainas! Fëmijët nuk janë për negocim, është detyrim moral dhe ligjor për çdo vend

Presidenti i Ukrainës, Volodymyr Zelensky, ka bërë thirrje të fortë drejt komunitetit ndërkombëtar që të  gjithë fëmijët ukrainas të marrë me forcë nga Rusia duhet të kthehen në shtëpi, e kjo duhet të ndodh sa më parë. Sipas autoriteteve ukrainase, mbi 20 mijë fëmijë janë zhvendosur me forcë nga zonat e pushtuara, shumë prej tyre në kampe në Rusi dhe Bjellorusi, ku i nënshtrohen indoktrinimit dhe riarsimimit të detyruar.

Ata janë të vegjël, por e kanë ndjerë luftën më shumë se kushdo tjetër. Mbi 20 mijë fëmijë ukrainas janë rrëmbyer dhe dërguar në Rusi apo Bjellorusi nga zonat e pushtuara.

Ndërkohë vetëm rreth 1.300 prej tyre janë kthyer. Të tjerët vazhdojnë të qëndrojnë në kampet e ashtuquajtura “qendra rehabilitimi”, ku, sipas hetimeve, iu bëhet presion për të harruar identitetin e tyre ukrainas.

Në lidhje me situatën presidenti Volodymyr Zelensky ka kërkuar veprim të menjëhershëm nga komuniteti ndërkombëtar. Në fjalën e tij, ai tha se pa kthimin e këtyre fëmijëve, nuk mund të ketë paqe të drejtë dhe të qëndrueshme.

Zelensky e cilëson këtë një krim të rëndë lufte dhe kërkon nga të gjitha shtetet aleate të Ukrainës që të rrisin presionin ndaj Rusisë.

“Ky nuk është vetëm një konflikt mes shtetesh – është një luftë për të ardhmen e brezit të ri. Nuk mund të flasim për drejtësi, nëse fëmijët tanë mbeten peng në tokë të huaj”, ka deklaruar ai.

Fushata fëmijët nuk janë për negocim, e nisur nga Ukraina, synon të tërheqë vëmendjen ndërkombëtare për këtë krizë humanitare.

Sipas Kievit, ky nuk është thjesht një konflikt ushtarak, por një luftë për shpirtin e një brezi të tërë.

Secili fëmijë që kthehet, është një fitore. Por për Zelenskyn, çdo ditë pa kthimin e të tjerëve, është një padrejtësi që nuk mund të harrohet.

Mes armësh dhe propagande, Ukraina kërkon më të thjeshtën – që fëmijët e saj të jenë në shtëpi. Sepse fëmijët nuk janë për negocim, është detyrim moral dhe ligjor për çdo vend që beson në të drejtat e njeriut.

Rruga Press