Zelensky-Perëndimit: Me armët tuaja do e kishim mbyllur luftën

Presidenti i Ukrainës, Volodymyr Zelensky vijon të jetë i pakënaqur me Perëndimin dhe ndihmën e ofruar prej tij për përballimin e agresionit ruse që po zgjatë prej më shumë se 55 ditësh.

Gjatë mesazhit të fundit, lideri ukrainas shprehet se nëse ushtria e vendit të tij do të kishte armët e nevojshme dhe që i kishte kërkuar aleatët, do ta kishte mbyllur luftën prej kohësh.

“Nëse do të kishim akses në të gjitha armët për të cilat kemi nevojë, apo që kanë partnerët tanë dhe janë të krahasueshme me armatimin që përdor Federata Ruse, do e kishim mbyllur me kohë këtë luftë”, tha Zelensky.

Më tej, presidenti Zelensky vijoi akuzat ndaj ushtrisë ruse të cilët e quajti barbare dhe çnjerëzore.

“Ushtria ruse do të kujtohet në histori si më barbarja dhe më çnjerëzorja në botë. Vrasja e mijëra civilëve të pafajshëm, shkatërrimi i ndërtesave me të gjitha llojet e armëve, do të mbetet vulë për këtë ushtri dhe do ta shënojë Federatën ruse si burim të së keqes”, përfundoi Zelensky.

Rruga Press