Zbulohen rreth 5 mijë raste të abūzimit sēksūal të fëmijëve nga priftërinjtë në Portugali

Dëshmi tronditëse kanë dalë në dritë në lidhje me abuzimin seksual të të miturve nga anëtarët e Kishës Katolike të Portugalisë gjatë 70 viteve të fundit. Sipas një raporti të kryer nga një komision i pavarur për gati një vit, bazuar në më shumë se 500 dëshmi, viktimat arrijnë në të paktën 4815.

“Këto dëshmi na lejuan të zbulojmë mijëra viktima të abuzimit seksual,”, tha koordinatori i komisionit të ekspertëve, gjatë prezantimit të raportit.

77% e abuzuesve ishin priftërinj dhe shumica e viktimave ishin djem, vuri në dukje Strecht, duke shtuar se ata ishin abuzuar në shkollat ​​katolike, shtëpitë e priftërinjve, ndër të tjera.

Ankesat për abuzimet erdhën nga njerëz nga çdo krahinë e Portugalisë, por edhe nga shtetas portugez në vende të tjera të Europës, Afrikës dhe kontinentit amerikan.

Komisioni i pavarur filloi hetimin e tij në janar 2022 pasi një raport i botuar në Francë zbuloi se rreth 3,000 priftërinj dhe zyrtarë të tjerë fetarë abuzuan seksualisht me më shumë se 200,000 fëmijë.

Kisha Katolike Portugeze i kërkoi Strecht-it të ngrinte një komision për të shqyrtuar fenomenin e abuzimit seksual të fëmijëve brenda saj.

Përballë mijëra rasteve të abuzimit seksual nga priftërinjtë katolikë të zbuluar në të gjithë botën dhe akuzave për mbulim nga anëtarët e kishës, Papa Françesku u zotua në vitin 2019 të zhvillojë një “betejë gjithëpërfshirëse” kundër pedofilisë në kishë.

Përveç Francës dhe Portugalisë, vende të tjera janë përpjekur të hetojnë ankesa të ngjashme, duke përfshirë Irlandën, Gjermaninë, Holandën dhe Australinë.

Rruga Press