Zara mbyll mbi 500 dyqane në Rusi

Shitësi spanjoll i modës Inditex, që është pronari i Zara-s, ka konfirmuar se do të mbyllë 502 dyqane dhe do të ndalojë shitjet online në Rusi, në përgjigje të krizës në Ukrainë.

“Në rrethanat aktuale, Inditex nuk mund të garantojë vazhdimësinë e operacioneve dhe kushteve tregtare në Federatën Ruse dhe pezullon përkohësisht aktivitetin e saj”, thuhet në njoftim.

Më herët, PayPal ka thënë se nuk do të lejojë më përdorimin e sistemit të pagesave në Rusi.

Samsung njoftoi gjithashtu se do të ndalojë dërgesat në Rusi, shtet ky i cili ka bombarduar pamëshirshëm disa qytete të Ukrainës ditët e fundit.

Mëngjesin e së premtes, një raketë goditi termocentralin më të madh bërthamor të Evropës, me udhëheqësit perëndimorë që paralajmëruan se katastrofa u shmang vetëm për pak.

Ndërkohë, edhe Microsoft pezulloi shitjet në Rusi të premten dhe një sërë biznesesh të tjera – duke përfshirë shtëpinë luksoze franceze të modës Chanel, H&M, IKEA dhe Nike – të cilët kanë ndaluar shitjet brenda vendit.

Rruga Press