Zaçaj për mediat italiane: 2 pikat “kritike” pse pezulluam paktin për emigrantët
Kryetarja e Gjykatës Kushtetuese të Shqipërisë, Holta Zaçaj, ka dhënë një intervistë për Corriere Della Sera pas pezullimit të ratifikimit nga Kuvendi të marrëveshjes së emigrantëve me Italinë.
Në intervistën e saj, Zaçaj është shprehur se janë dy pika kritike që duhen hetuar në Gjykata Kushtetuese, nëse janë në përputhje me ligjin.
“Zakonisht nuk flas me shtypin, por e kuptoj që kjo çështje është e rëndësishme dhe delikate jo vetëm për ne, por edhe për Italinë dhe ndoshta është e drejtë të sqarohen pak gjërat”, tha Zaçaj.
Kryetare të sqarojmë ndërkohë pyetjen: a i thotë Gjykata Kushtetuese “jo” marrëveshjes Romë-Tiranë?
“Jo. Procesi që çon në ratifikimin e marrëveshjes është pezulluar pasi mbi një e katërta e deputetëve shqiptarë na kanë kërkuar të kontrollojmë kushtetutshmërinë ose jo të protokollit të nënshkruar mes dy vendeve. Ne kemi vlerësuar se ankesa i plotëson kriteret e pranueshmërisë dhe sipas rregullores sonë kjo sjell automatikisht ndërprerjen e procedurave parlamentare për ratifikimin. Por dua të sqaroj: ne nuk kemi hyrë në brendësi të protokollit të nënshkruar”.
Çfarë kundërshtojnë tridhjetë deputetët?
“Në thelb dy aspekte. E para: mosrespektimi i pretenduar i procedurës së negociatave dhe nënshkrimit. Sipas tyre, kjo lloj marrëveshje kërkon autorizimin e presidentit pasi prek çështje territoriale. Shkurt, për ta nuk mund të jetë një marrëveshje mes qeverive, por mes shteteve”.
Dhe aspekti i dytë?
“Sipas tyre, protokolli mund të çojë në shkeljen e të drejtave të njeriut.”
Pse shkaktohet pezullimi automatik i procesit parlamentar?
“Sepse pas ratifikimit Gjykata, sipas rregullave tona, nuk mund të kontrollojë më legjitimitetin ose jo të marrëveshjes. Dhe ankimi ngre dyshime për kushtetutshmërinë e protokollit”.
Në seancën e 18 janarit, a do të hyjë Gjykata në themel të marrëveshjes Rama-Meloni?
“Na kërkohet një gjë e tillë, duhet të shqyrtojmë në detaje protokollin mbi ato dy pika të ngritura nga një e katërta e Kuvendit të Shqipërisë. Por e përsëris sërish: ne nuk kemi hyrë vërtet në këtë çështje”.
Ka nga ata që kanë frikë nga lëvizjet e opozitës për t’ju detyruar të shtyni vendimin.
“Dy palët do të duhet të dërgojnë dokumentacionin deri më 4 janar 2024. Dhe që nga dita e sotme, për paraqitjen e ankesës (6 dhjetor 2023) kemi maksimum tre muaj për të vendosur. Në këtë rast konkret do të thotë që deri më 6 mars 2024 Gjykata duhet të thotë nëse marrëveshja është legjitime apo jo”.
Rruga Press