Ministri Sveçla: Do të sigurojmë lëvizje të lirë për të gjithë qytetarët në përputhje me ligjet në fuqi

Ministri i Punëve të Brendshme, Xhelal Sveçla të shtunën së bashku me zëvendësministrin Bardhyl Dobra, ka realizuar vizitat e rregullta në komunat veriore të Republikës së Kosovës.

Sveçla ka bërër të ditur se nga takimet e shumta me pjesëtarët e Policisë së Kosovës dhe të KFOR–it, ka kuptuar se situata në këto komuna është e qetë dhe stabile.

”Nga kjo vizitë, ne pamë nga afër se ata suksesshëm po përmbushin detyrat e tyre në zbatimin e ligjit, ruajtjen e paqes dhe ofrimin e një stabiliteti të qëndrueshëm si qëllim yni i përbashkët. Angazhimi i tyre i përditshëm në ofrimin e sigurisë dhe vendosjen e ligjshmërisë janë edhe lehtësim por edhe garancë për një jetesë më të mirë të banorëve të kësaj zone”, ka shkruar  Sveçla në Facebook.

Ministri Sveçla ka thënë se institucionet e Republikës së Kosovës do të vazhdojnë të sigurojnë lëvizjen e lirë për të gjithë qytetarët pa dallim, në përputhje me ligjet në fuqi.

 “Do të jemi zbatues të vendimeve të drejta dhe ligjore të cilat janë në pajtim me Kushtetutën e Republikës së Kosovës”, ka shkruar ai.

Rruga Press