VIDEO/ Tensione në Universitetin e Novi Sadit, dekani përzë studentët protestues

Studentët e Fakultetit Juridik në Novi Sad kanë hyrë në ndërtesën e Fakultetit të Filozofisë, ku mëngjesin e sotëm dekani Milivoj Alanoviç kishte përzënë studentët protestues.

Më pas, me thirrjen e dekanit, në ambientet e fakultetit kanë mbërritur pjesëtarë të Njësisë Ndërhyrëse dhe tre automjete policore (“Marica”).

Dy fakultetet ndajnë të njëjtën ndërtesë ndërsa menjëherë pas kësaj ka ndërhyrë edhe Xhandarmëria e Serbisë ku situata është tensionuar, por deri tani nuk raportohen të lënduar.

Përpara godinës ndodhen forca policore, xhandarmëria dhe një grup qytetarësh të mbledhur me thirrjen e studentëve protestues ndërsa ka pasur shtyrje mes tyre dhe forcave të sigurisë.

Në një deklaratë për mediat, dekani tha se “asgjë e pazakontë nuk ndodhi në Fakultetin e Filozofisë këtë mëngjes”, por se një grup profesorësh hynë në vendet e tyre të punës. Ai shtoi se u shpjegoi studentëve se veprimet e tyre përbëjnë shkelje të rëndë dhe janë subjekt i masave disiplinore, pasi kanë qëndruar në ambientet e fakultetit jashtë orarit të punës. Dekani theksoi se ata do të qëndrojnë në ndërtesë deri në një njoftim të mëtejshëm, derisa situata të normalizohet.

Protestat në Serbi vijojnë prej muajsh, ku ndër kërkesat kryesore janë mbajtja e zgjedhjeve të parakohshme dhe largimi i presidentit Aleksandar Vuçiç.

Studentëve dhe profesorëve iu bashkuan gjatë edhe bujq e grupe qytetarësh, në mbështetje të protestës.

Rruga Press