Vetingu në drejtësi, Komisioni i Venecias parimisht pro zgjatjes së afatit
Komisioni i Venecias është pro zgjatjes së afatit të organeve të vetingut. Në opinionin paraprak të mbërritur në Tiranë, ekspertët ndërkombëtarë janë të mendimit se propozimi për ndryshimin e kushtetutës, plotëson kriteret që do të justifikonin zgjatjen me dy vite e gjysmë të mandatit të Komisionit të Pavarur të Kualifikimit dhe Komisionerit Publik.
Pas këtij drafti paraprak, në datën 12 dhjetor pritet që të zhvillohet edhe sesioni plenar i Komisionit të Venecias ku do të miratohet opinioni final, nga ku më pas do të vijojë edhe procedura parlamentare për ndryshimin e kushtetutës.
Zgjatja e afatit të organeve të vetingut ishte një kërkesë e Operacionit Ndërkombëtar të Monitorimit, i mbështetur fort edhe nga Ambasada e Shteteve të Bashkuara të Amerikës. Ky dokument pritet të jetë edhe argumenti i shumicës parlamentare për të bindur opozitën që të bashkojë votat për ndryshimin kushtetues.
Sipas afatit në fuqi, Komisionit të Pavarur të Kualifikimit dhe Komisionerit Publik i përfundon mandati më 17 qershor të vitit 2022, ndërsa propozimi i mazhorancës synon që këtë datë ta çojë më 31 dhjetor të vitit 2024./a2/