Vendi që noton në naftë, por s’ka drita!

Dy të tretat e popullsisë së Nigerisë, pa energji elektrike

Timipre Sylva, Ministri i Shtetit i Nigerisë për Burimet e Naftës, deklaroi se 62 për qind e njerëzve në vend nuk kanë energji elektrike.

Një konferencë u mbajt në kryeqytetin Abuja për të diskutuar burimet e naftës dhe gazit në Nigeri.

Duke iu drejtuar të pranishmëve, Sylva tha se, sipas disa statistikave, “62 për qind e nigerianëve nuk kanë akses në energji elektrike”.

Duke vënë në dukje se 90 përqind e njerëzve në vend nuk kanë akses në “karburantet moderne të gatimit”, si gazi, Sylva tha se qeveria po punon për të kapërcyer këto vështirësi për të siguruar energji të besueshme dhe të përballueshme për një popullsi prej më shumë se 200 milionë banorësh.

Sylva theksoi se ndërsa bota po përballet me ndryshimet klimatike, burimet e rinovueshme të energjisë nuk do të jenë të mjaftueshme deri në vitin 2050.

Prandaj, sipas tij, është e rëndësishme të adresohet kërkesa në rritje për energji në botë dhe varfëria e përhapur energjetike.

Duke theksuar se Nigeria ka potencial të madh për t’u bërë një vend i industrializuar, Sylva shtoi se qeveria po punon për të zhvilluar infrastrukturën kryesore në sektorin e energjisë për ta bërë Nigerinë një vend eksportues të gazit.

Gjysma e pyjeve janë shkatërruar në 12 vitet e fundit në Nigerinë e pasur me naftë, një nga ekonomitë më të mëdha të Afrikës, për shkak të rritjes së popullsisë dhe mungesës së energjisë elektrike.

Ekspertët i kanë bërë thirrje më parë qeverisë që të ndërhyjë urgjentisht, duke thënë se mbi 60 për qind e popullsisë është pa energji elektrike.

Ndërprerjet e energjisë elektrike janë të shpeshta në shumë pjesë të vendit që kanë probleme me prodhimin e energjisë elektrike.

Shumica e njerëzve, të cilët mund të marrin energji elektrike mesatarisht për katër orë në ditë, plotësojnë nevojat e tyre për energji përmes gjeneratorëve.

Rruga Press