Ushtarët ukrainas në Kursk nuk janë të rrethuar, pavarësisht pretendimeve të Putinit dhe Trumpit

Ushtarët ukrainas në rajonin rus Kursk kanë humbur disa nga territoret e fituara gjatë ditëve të fundit, por nuk janë të rrethuar, ndryshe nga pretendimet e presidentit amerikan Donald Trump dhe presidentit rus Vladimir Putin. Agjencia Reuters raportoi këtë informacion, duke cituar tre zyrtarë amerikanë dhe evropianë të njohur me shërbimet e inteligjencës me vendet e tyre.

Sipas një zyrtari amerikan dhe një burimi tjetër të njohur me situatën, agjencitë amerikane të inteligjencës, përfshirë CIA-n, ndanë këtë vlerësim me Shtëpinë e Bardhë javën e kaluar.

Megjithatë, Trumpi vazhdoi të pretendonte se trupat ukrainase janë të rrethuara në rajonin perëndimor të Kurskut, në Rusi.

Vlerësimet e inteligjencës amerikane dhe evropiane tregojnë se forcat ukrainase janë nën presion të madh nga ushtria ruse, por nuk janë plotësisht të rrethuara.

Ekspertët e kanë cilësuar si dezinformim pretendimin e Putinit se forcat ukrainase në Kursk janë të rrethuara dhe do të duhet “ose të dorëzohen ose do të vriten”. Sipas tyre, kjo është përpjekje për të treguar se Rusia po ofron lëshime duke shpëtuar jetët e ushtarëve ukrainas, duke i dhënë Putinit një avantazh në bisedimet për armëpushim.

Në një postim në rrjetet sociale më 14 mars, Trumpi ka thënë se kishte kërkuar nga presidenti rus të kursente jetët e mijëra ukrainasve që ai pretendonte se ishin “plotësisht të rrethuar dhe të pambrojtur”. Sipas Trumpit, Putini ishte i gatshëm ta bënte këtë nëse ata dorëzoheshin.

Trump e përsëriti pretendimin për rrethimin e ushtarëve ukrainas gjatë një fjalimi në Qendrën Kennedy në Uashington të hënën dhe në një intervistë për Fox News të martën.

Rruga Press