UNESCO-ja alarmon për shkatërrimet e monumenteve në Ukrainë

UNESCO-ja ka paralajmëruar për dëmet që lufta e Rusisë kundër Ukrainës mund t’i bëjë trashëgimisë kulturore të atij vendi dhe u është bashkuar dënimeve në rritje të institucioneve kulturore kundër pushtimit rus të Ukrainës. Organizata e Kombeve të Bashkuara për Edukim, Shkencë e Kulturë ka njoftuar se po punon për vlerësimin e institucioneve dhe lokaliteteve ukrainase, të cilat Kombet e Bashkuara i kanë listuar në Listën e Trashëgimisë Botërore.

Në Ukrainë gjenden shtatë lokalitete me statusin e trashëgimisë botërore, përfshirë dhe Katedralen e Shën Sofisë në kryeqytetin e Ukrainës, Kiev. Lokalitetet e tjera në këtë listë gjenden në qytetin perëndimor në Lavov, në portin e Detit të Zi, në Odesa dhe në qytetin më të madh të Ukrainës, në Harkov. Në të katër qytetet ka pasur granatime e bombardime.

“Duhet ta ruajmë këtë trashëgimi kulturore si dëshmi e së kaluarës dhe si vektor për paqe në të ardhmen”, ka thënë drejtoresha e përgjithshme e UNESCO-s, Audrey Azoulay.

Në komunikatë ka shkruar se agjencia që ajo drejton po koordinohet me autoritetet ukrainase që monumentet kryesore dhe lokalitetet gjithandej Ukrainës të shënjohen si monument i mbrojtur me shenjën e njohur ndërkombëtarisht për mbrojtje të trashëgimisë në kohë lufte.

Së paku shtatë institucione arsimore janë dëmtuar në sulmet e javës së fundit, përfshirë edhe Universitetin Kombëtar Karazin në Harkovu të mërkurën, thuhet në komunikatë.

Rruga Press