Ukraina sulmon objektet industriale ruse në rajonin e Uraleve

Ukraina ka sulmuar me dronë një rafineri nafte ruse në Urale Jugore, konfirmoi sot  guvernatori i rajonit, pas një sërë goditjesh me rreze të gjatë veprimi  që Kievi ka ndërmarrë kohët e fundit.

“Dronë armiq  sulmuan një objekt industrial në rajon”, shkroi në Telegram guvernatori i Orenburgut, Jevgeni Solntsev. Ai shtoi se nuk pati të plagosur dhe se proceset teknike të kompanisë nuk u ndërprenë.

Megjithatë, video të publikuara në rrjete sociale tregonin disa goditje me dronë në territorin e një rafinerie në qytetin Orsk.

Qyteti, me mbi 200 mijë banorë dhe i vendosur pranë kufirit me Kazakistanin, ndodhet gati 1 500 kilometra larg kufirit me Ukrainën.

Më herët, një sulm tjetër me dronë ukrainas kishte goditur një fabrikë plehrash kimike në qytetin Berezniki, në rajonin e Permit në Urale.

Sipas guvernatorit Dmitri Makhonin, sulmi dëmtoi një ndërtesë banimi, por nuk pati viktima, dhe prodhimi në fabrikë u ndërpre vetëm përkohësisht. Edhe Berezniki ndodhet më shumë se 1 500 kilometra nga kufiri ukrainas.

Që nga fillimi i pushtimit të plotë rus në shkurt 2022, Ukraina po lufton me ndihmën e Perëndimit dhe po përdor gjithnjë e më shumë dronë luftarakë për të goditur objektiva në thellësi të territorit rus. 

Rruga Press