Ukraina në alarm të kuq-mund ta pushtojë Rusia nga dita në ditë. Sot Biden telefonon Putin

Ukraina është nën kontrollin e njësive ushtarake ruse që kanë zabtuar kufijtë e saj verior, lindor dhe jugor duke rritur rrezikun e një konflikti të ashpër mes dy vendeve që përllogaritet se mund të shkaktojë dhjetra mijëra viktima. Frikën për nisjen e një lufte e ka shtuar presidenti amerikan Joe Biden, i cili dhënë njoftimin më të fortë publik deri më tani. Ai u bëri thirrje qytetarëve amerikanë në Ukrainë që të largohen sa më shpejt të jetë e mundur për shkak të rrezikut të shtuar të pushtimit rus, gjë që lë të kuptohet se situata në kufi mes dy vendeve nuk është e mirë. 

“Gjërat mund të dalin nga kontrolli shumë shpejt,”- tha ai për NBC. Ndërsa sqaroi se nuk do të dërgonte trupa amerikane në Ukrainë, madje as për transportin e sigurt të bashkatdhetarëve të tyre, sepse mund të konsiderohet si provokim dhe mund të shkaktojë një luftë botërore. “Po flasim për një nga ushtritë më të mëdha në botë. Nëse amerikanët dhe rusët fillojnë të qëllojnë kundër njëri-tjetrit, atëherë ne jemi në një botë shumë të ndryshme.”

Shumë kishin spekuluar se Vladimir Putin nuk do të pushtonte gjatë Lojërave Olimpike Dimërore të Pekinit (që përfundonin më 20 shkurt) për të mos mërzitur homologun e tij kinez Xi Jinping. Por CIA ka mësuar detaje të tjera! Revista gjermane Der Spiegel lëshoi ​​paralajmërimin më urgjent për aleatët e NATO-s deri më tani për një sulm të afërt rus në Ukrainë. Bazuar në informacionet e reja, ekziston frika se një sulm mund të ndodhë të mërkurën e ardhshme, më 16 shkurt.

Spiegel gjithashtu raporton se Shtetet e Bashkuara kanë dhënë detaje për detajet e pushtimit rus dhe detyrat që do të marrë çdo njësi ushtarake.
Megjithatë, ndërkohë që paralajmërimet intensifikohen, sot, të shtunë, pritet të vazhdojnë përpjekjet diplomatike për deeskalim të situatës dhe arritjen e një marrëveshjeje mes palëve. Agjencia ruse e lajmeve Ria Novosti raportoi se Vladimir Putin dhe Joe Biden do të flasin me telefon sot. Zëdhënësi i Kremlinit Dmitry Peshkov tha se telefonata do të kryhet  me iniciativën e Shteteve të Bashkuara. Putin do të flasë gjithashtu me homologun e tij francez Emanuel Macron.

Biseda të pafrytshme

E gjithë kjo vjen pas raundit të ri të djeshëm të konsultimeve për paqen në kuadër të “Grupit të Normandisë” (Rusi, Ukrainë, Francë, Gjermani), që u zhvillua në Berlin, i cili përfundoi pa rezultat. Përfaqësuesit e të katërt vendeve nuk arritën të lidhin pikëpamjet divergjente për interpretimin e marrëveshjeve të paqes të Minskut në Donbas. Ministri i Jashtëm ukrainas Dmitry Kuleba ka hedhur poshtë presionin e Moskës për bisedime të drejtpërdrejta midis Kievit dhe separatistëve rusishtfolës.

“Nëse e bëjmë këtë, atëherë do të ndryshojë statusi i Rusisë, e cila, si pjesë e konfliktit, do të bëhet ndërmjetëse. Ne kurrë nuk do ta pranojmë këtë”, tha ai.

Në Moskë, Ministria e Jashtme shprehu pakënaqësinë e saj për faktin se BE dha një përgjigje kolektive ndaj propozimeve të sigurisë të dërguara nga qeveria ruse për secilin prej 27 vendeve anëtare të saj. Zëdhënësi i Kremlinit përmendi gjithashtu gabimin e sekretares së jashtme britanike Lis Trace (u provokua nga Sergei Lavrov dhe ngatërroi dy rajone ruse, si ukrainase) si një shenjë të injorancës së liderëve perëndimorë për situatën reale në rajon.

Por si ka nisur konflikti?

Tensionet e Luftës së Ftohtë arrijnë kulmin 8 vjet pasi Rusia aneksoi gadishullin jugor të Krimesë të Ukrainës. Që atëherë, ushtria ukrainase është përfshirë në një luftë të vazhdueshme me rebelët e mbështetur nga Rusia në provincat lindore pranë kufirit. Nga ana tjetër Rusia ka mbështetur një kryengritje të përgjakshme të armatosur në rajonin lindor të Donbasit të Ukrainës që nga viti 2014. Rreth 14,000 njerëz – përfshirë shumë civilë – janë vrarë në luftime që nga ajo kohë. Megjithatë marrëveshja e paqes e Minskut – e cila synonte t’i jepte fund konfliktit në Ukrainën lindore – duket se nuk ka më ndikim. Rusia këmbëngul se trupat e saj do të kthehen në bazat e tyre të përhershme pas përfundimit të stërvitjes. E gjitha sepse Kremlini nuk mund të pranojë që Ukraina – një ish-republikë sovjetike me lidhje të thella sociale dhe kulturore me Rusinë – mund të bashkohet me NATO-n.

Rruga Press