Ukraina kërkon që KB e Kryqi i Kuq të hetojnë vrasjen e të burgosurve të luftës në Donetsk

Ukraina ka bërë thirrje që Kombet e Bashkuara dhe Kryqi i Kuq të lejohen të hetojnë vdekjen e më tepër se 50 të burgosurve ukrainas të luftës në një sulm në territorin e okupuar, raporton BBC.

Kryqi i Kuq ka kërkuar qasje në burg për të ndihmuar evakuimin dhe trajtimin e të lënduarve.

Ukraina dhe Rusia kanë akuzuar njëra-tjetrën për sulmin në kamp.

Në një video ruse shihen rrënoja dhe trupa të pajetë.

Mbetet e paqartë se çfarë ka ndodhur në kampin-burg në Olenvika, që kontrollohet nga separatistët rus në Donetsk.

Ukraina ka thënë se kampi është sulmuar nga Rusia në tentim për të shkatërruar dëshmitë e torturës dhe vrasjeve. Presidenti i Ukrainës, Volodymyr Zelensky, e ka përshkruar këtë ngjarje si “krim lufte nga ana e Rusisë”.

Ndërkohë Rusia ka thënë se kampi është goditur nga raketat ukrainase.

Në mesin e të burgosurve që gjendeshin në kamp ishin edhe anëtarët e batalionit Azov, që u dorëzua në maj pas një rezistence të gjatë në Mariupol.

Daniil Bezsonov, zëdhënës i të ashtuquajturës Republika Popullore e Donetskut, ka thënë se raketa ka goditur direkt në baraka ku qëndronin të burgosurit.

Ndërkohë Ministria e Mbrojtjes e Rusisë ka thënë se sulmi është bërë nga artileria amerikane Himars.

Rruga Press