Ukraina i kërkon Katarit ta rrisë eksportin e energjisë

Presidenti i Ukrainës u bëri thirrje të shtunën vendeve të pasura me energji që të rrisin prodhimin e naftës dhe gazit natyror për t’i dalë ballë humbjes së furnizimeve ruse pas sanksioneve për luftën e Moskës ndaj vendit të tij, raporton AP.

Volodymyr Zelensky bëri një paraqitje përmes videos në Forumin Doha të Katarit.

Zelensky u kërkoi vendeve të rrisin eksportet e tyre të energjisë – diçka veçanërisht e rëndësishme pasi Katari është një lider botëror në eksportin e gazit natyror. Sanksionet perëndimore kanë prekur thellësisht eksportet ruse, të cilat janë thelbësore për vendet evropiane.

“Shtetet përgjegjëse, veçanërisht Katari, ju jeni furnizues të besueshëm dhe me reputacion të burimeve të energjisë”, tha Zelensky. “Dhe ju mund të kontribuoni në stabilizimin e situatës në Evropë. Ka shumë që mund të bëhet për të rivendosur drejtësinë”.

“E ardhmja e Evropës varet nga përpjekjet tuaja. Ju bëj thirrje që të rrisni prodhimin e energjisë për ta bërë Rusinë të kuptojë se asnjë shtet nuk duhet të përdorë energjinë si armë dhe të shantazhojë botën”, ka thënë ai.

Ai e krahasoi shkatërrimin nga Rusia të qytetit port të Mariupolit me shkatërrimin rus dhe sirian në qytetin e Alepos. Paralajmëroi se lufta mund të ndikojë në eksportet bujqësore të Ukrainës në botë.

“Trupat ruse bombardojnë fushat në Ukrainë, hedhin në erë makineritë bujqësore, shkatërrojnë rezervat e nevojshme për mbjellje. Ata na bllokuan portet detare. Pse po e bëjnë këtë?” ai pyeti. “Shteti ynë do të ketë ushqim të mjaftueshëm. Por mungesa e eksporteve nga Ukraina do të godasë shumë vende në botën islame, Amerikën Latine dhe pjesë të tjera të botës”.

Humbja e grurit ukrainas tashmë ka shqetësuar vendet e Lindjes së Mesme si Egjipti, të cilët mbështeten në ato eksporte. Zelensky foli të premten në telefon me presidentin egjiptian Abdel Fattah el-Sissi, një aleat i ngushtë i presidentit rus Vladimir Putin.

Rruga Press