Ukraina fajëson Rusinë për sulmin kibernetik

Qeveria ukrainase ka akuzuar Rusinë se qëndron pas sulmit kibernetik të së premtes ndaj dhjetëra faqeve zyrtare të internetit.

Rreth 70 faqe të internetit qeveritare u mbyllën përkohësisht, në sulmin më të madh të tillë në Ukrainë në katër vjet.

Përpara se faqet të dilnin jashtë linje, u shfaq një mesazh që paralajmëronte ukrainasit të “përgatiteshin për më të keqen”. Qasja në shumicën e faqeve u kthye brenda disa orësh.

SHBA dhe NATO e dënuan sulmin dhe i kanë ofruar mbështetje Ukrainës. Rusia nuk ka komentuar çështjen.

Ekspertët në Ministrinë e Informacionit të Ukrainës publikuan një plan kohor se si u përhap lajmi për sulmin, duke theksuar se mediat ruse e raportuan atë përpara mediave ukrainase.

Ata pretenduan se sulmet ishin në përgjigje të asaj që ata e quajtën dështimin e Rusisë në bisedimet e saj të fundit me NATO-n mbi Ukrainën.

Ukraina është vënë nën presion të madh nga fqinji i saj, me një grumbullim prej rreth 100 mijë trupash ruse pranë kufijve të saj.

Shërbimi i sigurisë SBU i Ukrainës thotë se në vetëm nëntë muaj vitin e kaluar “neutralizoi” 1200 sulme kibernetike ose incidente.

NATO ka thënë se së shpejti do të nënshkruajë një marrëveshje me Ukrainën për bashkëpunimin e zgjeruar kibernetik, i cili do t’i japë asaj akses në platformën e shkëmbimit të informacionit të malware të aleancës.

Shtëpia e Bardhë thotë se do t’i ofrojë Ukrainës çdo mbështetje që i nevojitet për t’u rikuperuar nga sulmi.

Rruga Press