Udhëheqësit evropianë tallen me dashurinë e fundit të Orbanit me Putinin
Udhëheqësit evropianë kritikuan ashpër vizitën e kryeministrit hungarez Viktor Orbán në Moskë të premten, ku ai u takua me presidentin rus Vladimir Putin.
Gjatë një konference për shtyp me homologun e tij slloven në Berlin, kancelari gjerman Friedrich Merz tha se Orbán ishte paraqitur në Kremlin, “pa një mandat evropian”.
Merz tha se nuk ishte i befasuar nga veprimet e Orbán-it, pasi kjo nuk ishte hera e parë që ai vepronte në mënyrë autonome, por dyshoi se udhëheqësi hungarez do të ndihmonte në ndalimin e luftës në Ukrainë.
Orbán “ka idetë e tij se si ta përfundojë këtë luftë. Deri më tani, ato nuk janë realizuar”, tha Merz.
Kancelari gjerman tha se kishte dyshime, nëse Orbán “do të ketë më shumë sukses këtë herë sesa herën e kaluar”.
Orbán vizitoi për herë të fundit Moskën në korrik 2024, duke e portretizuar veten si në një “mision paqeje”.
Kryeministri slloven Robert Golob u pajtua me Merz, duke thënë se shpresonte që vizita e Orbán “nuk do të shkaktojë ndonjë dëm të madh”.
«Nuk presim ndonjë përfitim apo avantazh nga kjo vizitë», tha Golob.
Gjatë takimit me Putinin, Orbán tha se Budapesti do të ishte gati të priste një samit midis Rusisë dhe Shteteve të Bashkuara, për të diskutuar një plan paqeje në Ukrainë.
“Hungaria është e interesuar për paqen… Hungaria është e gatshme të presë bisedime të tilla dhe të ofrojë ndihmë në përfundimin me sukses të këtij procesi”, i tha Orbán presidentit rus gjatë takimit.
Putin e falënderoi udhëheqësin hungarez, duke shtuar se ideja për ta konsideruar Hungarinë si një vend të mundshëm për një takim lindi nga Uashingtoni.
“Ishte propozimi i Donald [Trump]. Ai tha menjëherë: ‘Ne [të dy] kemi marrëdhënie të mira me Hungarinë, ju keni, dhe unë gjithashtu, kështu që po propozoj këtë opsion,’” tha Putin.
Putin shtoi se do të ishte “i kënaqur” të vinte në Budapest, në rast se “negociatat me SHBA-në do të çojnë në këtë”.
Takimi i së premtes shënon herën e dytë që Orbán takohet me Putinin në Moskë, që kur Rusia nisi pushtimin e plotë të Ukrainës në fillim të vitit 2022. Takimi i korrikut 2024, gjatë kryesimit gjashtëmujor të Këshillit të Bashkimit Evropian nga Hungaria, i zuri në befasi udhëheqësit e BE-së.
Udhëheqësit evropianë, përfshirë kryeministren e atëhershme të Estonisë, Kaja Kallas, e dënuan udhëtimin. Kallas është tani shefe e punëve të jashtme të BE-së.
“Ai po e shfrytëzon pozicionin e presidencës së BE-së për të mbjellë konfuzion”, tha Kallas në atë kohë. Kohët e fundit, Orbán bllokoi zgjatjen e sanksioneve të BE-së kundër Rusisë dhe mbështetjen financiare për Ukrainën, të cilat kërkojnë mbështetje unanime nga vendet anëtare.
Në një intervistë me Mathias Döpfner, drejtor ekzekutiv i grupit mediatik gjerman Axel Springer (i cili zotëron POLITICO), ai kritikoi BE-në për mbështetjen e Ukrainës, duke thënë se Kievi nuk ka “asnjë shans” për të fituar luftën.
Udhëheqësi hungarez, vendi i të cilit varet nga furnizimet me energji ruse, ka siguruar gjithashtu një përjashtim njëvjeçar nga sanksionet e SHBA-së mbi naftën ruse.
Përpara takimit të së premtes, Orbán tha në një deklaratë në X se do të shkonte në Moskë për të siguruar furnizimet me naftë dhe gaz në Hungari, me qëllim që ato të mbeteshin “të sigurta dhe të përballueshme”./ Politico.
Rruga Press