U bë makth për Aston Villa-n, emri i Muçit përfundon në Angli, shtohen admiruesit për yllin kuqezi

Ylli kuqezi, Ernest Muçi, po kalon një moment të magjishëm në karrierën e tij, është kthyer në lider absolut te Legia, një idhull për tifozët.

Talenti shqiptar, me paraqitjet e tij të shkëlqyera, ka tërhequr vëmendjen e shumë klubeve të mëdha Evropiane, e kërkojnë në Spanjë, por së fundmi emri i tij po qarkullon edhe në Premier League. Muçi u shndërrua në makth për Aston Villa-n në Conference League, në dy përballje kundër tyre, Muçi realizoi tre gola, i fundit brenda në Villa Park ishte fantastik.

Sfida dyshe me ekipin anglez ishte një vitrinë e jashtëzakonshme për sulmuesin shqiptar, dhe ashtu siç pritej, emri i tij po ngjall interes edhe në ishull.

Sipas Fabrizio Romano-s, ekspertit të merkatos, për sulmuesin e Legia-s ka shfaqur interesim ekipi i Fulham. Në fakt, Fulham ka shfaqur interesim edhe për Brojën, por kartoni i sulmuesit të Chelsea-t kushton minimalisht 30 milionë euro, ndërsa Muçi sipas “Transfermarkt” vlerësohet me 5 milionë euro.

E sigurt është që Legia është gati të futet në bisedime, tek ekipi polak çdo lojtar e ka një çmim, ndërsa shpresojnë që sulmuesi kuqezi të shndërrohet në transferimet më të shtrenjtë në historinë e klubit.

Rruga Press